Գիտնականների նոր ուսումնասիրությունը հաստատում է, որ տիեզերքի ընդարձակումը շարունակում է արագանալ՝ հերքելով անցյալ տարվա այն հետազոտությունը, ըստ որի՝ այդ գործընթացն այլևս չի արագանում։ Հետազոտողները պնդում են, որ տասնամյակներ շարունակ ընդունված պատկերացումն ուժի մեջ է մնում, իսկ դրա հիմնական բացատրությունը շարունակում է համարվել խորհրդավոր մութ էներգիան (dark energy)։
Գիտնականները հիշեցնում են, որ Մեծ պայթյունից հետո՝ մոտ 13,8 միլիարդ տարի առաջ, տիեզերքը սկսել է ընդարձակվել, և այդ գործընթացը շարունակվում է մինչ օրս։ 1998 թվականին հենց գերնոր աստղերի ուսումնասիրության շնորհիվ առաջին անգամ հայտարարվեց, որ տիեզերքի ընդարձակումը ոչ թե պարզապես շարունակվում է, այլ արագանում է։ Այս պայթյունները կարևոր գործիք են տիեզերական հեռավորությունները չափելու համար, քանի որ գիտնականները կարծում են, որ նման բռնկումներն ունեն մոտավորապես նույն լուսատվությունը։ Այդ բացահայտումը հետագայում հանգեցրեց «մութ էներգիա» հասկացության ձևակերպմանը՝ որպես մի ուժի, որը կարծես «հրում» է տիեզերքը դեպի ավելի արագ ընդարձակում։
