Թուրքական Samanyolu Haber կայքի փոխանցմամբ՝ Թուրքիայի արտգործնախարար Ահմեդ Դավութօղլուն 1.5 ժամանոց հանդիպում է ունեցել թուրքական ընդդիմության առաջնորդ, «Ժողովրդա-հանրապետական» կուսակցության (ԺՀԿ) նախագահ Քեմալ Քըլըչդարօղլուի հետ։
Հանդիպումից հետո Դավութօղլուն անդրադարձել է Սիրիայում տիրող իրավիճակին. «Մենք չկարողացանք Սիրիայի հետ հասնել ցանկալի համաձայնության։ Սիրիայում տիրող իրավիճակը չափազանց ծանր է։ Մենք շատ ջանքեր ենք գործադրել, որպեսզի իրավիճակը չհասներ դրան։
Սիրիական կառավարությունը պետք է բարեփոխումներ անցկացնի։ Մենք չենք կարող անմասն մնալ այդ երկրում ընթացող զարգացումներից։ Մենք ցանկանում ենք, որ Սիրիայի կառավարությունը լսի իր ժողովրդի իրավական պահանջը»։
Դավութօղլուն նաև հերքել է վերջին շրջանում լայն տարածում գտած այն տեղեկատվությունը, թե օգոստոսին Սիրիայի նախագահ Բաշար Ալ-Ասադի հետ Դամասկոսում ունեցած վեցժամյա հանդիպման ժամանակ վերջինս իրեն հայտնել է, որ եթե ՆԱՏՕ-ն հարվածի Սիրիային, ապա դա կհանգեցնի մերձավորարևելյան պատերազմի, որում կներգրավվեն նաև Իրանը, Իսրայելը, Լիբանանը. «Մեր այն հանդիպման ժամանակ այդպիսի խոսակցություն չի եղել»։
