Տեխնոլոգիական հսկա Google-ը շարունակում է արհեստական բանականության ուղղությամբ արմատական փոփոխությունները՝ վերափոխելով իր որոնողական համակարգը և ազդելով համացանցային տեղեկատվության սպառման եղանակների վրա։ Կալիֆոռնիայում անցկացված ամենամյա մշակողների համաժողովի ընթացքում ընկերությունը ներկայացրել է մի շարք նորարարություններ, այդ թվում՝ նոր «AI ռեժիմ» գործառույթը և վերջին սերնդի Gemini 2.5 մոդելը։
Google-ը հայտարարել է, որ «AI ռեժիմը» արդեն հասանելի է ԱՄՆ բոլոր օգտատերերին։ Ընկերության պնդմամբ՝ այս նոր հնարավորությունը որոնման գործընթացը դարձնում է նման փորձագետի հետ զրույցի՝ ի վիճակի պատասխանելու լայն շրջանակով հարցերի։ Գործառույթը ներկայացվել է ընդամենը երկուսուկես ամիս անց՝ դրա փորձնական տարբերակը Google Labs-ի սահմանափակ խմբում փորձարկելուց հետո։
Հայտնի է նաև, որ նոր Gemini 2.5 մոդելը արդեն ներդրվում է Google-ի որոնման ալգորիթմներում։ Ընկերությունը նախատեսում է առաջիկայում փորձարկել նաև այլ ԱԲ գործառույթներ, այդ թվում՝ կենդանի տեսահոսքերի միջոցով որոնում իրականացնելու և համերգի տոմսեր ինքնաշխատ կերպով գնելու հնարավորություններ։
Արհեստական բանականության ոլորտում իր «ամբողջական ներգրավվածության» մեկ այլ օրինակով՝ Google-ը հայտնեց, որ պատրաստվում է վերադառնալ խելացի ակնոցների շուկա։ Ընկերությունը ներկայացրեց Android XR համակարգով աշխատող նոր սերնդի ակնոցների նախատիպ, որոնք համալրված են առանց ձեռքի տեսախցիկով և ձայնային ԱԲ օգնականով։ Այս քայլը կատարվում է 13 տարի անց՝ Google Glass-ի ձախողումից հետո, որը փակվեց գաղտնիության վերաբերյալ դժգոհությունների պատճառով։
Թե երբ նոր ակնոցները հասանելի կդառնան կամ ինչ գին կունենան՝ ընկերությունը չի մանրամասնել։ Հայտնի է միայն, որ դրանք կարտադրվեն Gentle Monster և Warby Parker ընկերությունների հետ համագործակցությամբ։ Ակնոցները կմտնեն մրցակցային դաշտ՝ ներկայումս շուկայում առկա Meta-ի և Ray-Ban-ի համատեղ արտադրության մոդելների դեմ։
Google-ի ԱԲ վերափոխումը սկսվել է մեկ տարի առաջ՝ «AI overviews» կոչվող երկխոսական ամփոփումների ներդրմամբ, որոնք այժմ հաճախ հայտնվում են որոնման արդյունքների վերևում՝ փոխարինելով ավանդական հղումային դասավորությանը։ Ըստ Google-ի՝ շուրջ 1.5 միլիարդ մարդ արդեն կանոնավոր օգտագործում է այդ ամփոփումները, իսկ որոնումները դարձել են ավելի երկար և բարդ։
