Ռուսական Regnum լրատվական գործակալության փոխանցմամբ՝ Թուրքիայի տնտեսական քաղաքականության հետազոտությունների հիմնադրամի (TEPAV) արտաքին քաղաքականության վերլուծաբան Բուրջու Գյուլթեքին Փունսմանը մեկնաբանել է Ցյուրիխում ստորագրված հայ-թուրքական արձանագրությունների վերադարձը Թուրքիայի խորհրդարանի օրակարգ.
«Թուրքական կառավարության այդ նախաձեռնությունը լայն արձագանք չգտավ երկրի հասարակական-քաղաքական շրջանակներում, քանի որ վարչապետ Էրդողանի կառավարությունը միաժամանակ խորհրդարանի օրակարգ վերադարձրեց մոտ 200 չվավերացված պայմանագրեր ու համաձայնագրեր։
Այդ ցանկում հայ-թուրքական արձանագրությունների ներառումը վկայում է քաղաքական կամքի առկայության մասին։ Այժմ դրանց վավերացումը կախված կլինի տարածաշրջանային և միջազգային զարգացումներից, ինչպես նաև պաշտոնական Երևանի դիրքորոշումից։ Մոտ ապագայում հայ-թուրքական արձանագրությունների վերաբերյալ Հայաստանի կառավարության դիրքորոշումը շատ կարևոր է։
Հայաստանի հետ համաձայնագիրը տարածաշրջանում կամրապնդի Թուրքիայի դիրքերը և կվերականգնի «զրո խնդիր հարևանների հետ» սկզբունքով առաջնորդվող նրա սասանված իմիջը»։
Հիշեցնենք, որ 2009 թվականի հոկտեմբերի 10-ին Ցյուրիխում հայ-թուրքական արձանագրությունների ստորագրումից քիչ անց՝ նոյեմբերին, Փունսմանն իր «Արևելյան դուռ հանդիսացող նախիջևանյան փականի բացումը» հոդվածում գրել էր, որ հայ-թուրքական հարաբերությունների կարգավորումը կարող է դրական առումով էապես փոխել Նախիջևանում տիրող իրավիճակը:
Այդ կապակցությամբ Փունսմանը Հայաստանին առաջարկում էր վերացնել Նախիջևանի շրջափակումը` որպես բարի կամքի դրսևորում: Դրա արդյունքում Նախիջևանը հնարավորություն կստանար ուղղակի ցամաքային կապ հաստատել Բաքվի հետ և կվերածվեր հյուսիս–հարավ և արևմուտք–արևելք ուղղություններով տրանսպորտային ու տարանցիկ հանգույցի:
