7-րդ ամենամյա միջազգային տեխնոլոգիական ԴիջիԹեք ցուցահանդեսին կմասնակցեն նաև հայաստանյան կրթական հաստատությունները: Ոլորտին առնչվող կրթական ծրագրերը ցուցահանդեսում կներկայացնեն Հայաստանի պետական ճարտարագիտական (պոլիտեխնիկ), Հայ-ռուսական (Սլավոնական), Հայաստանի Ամերիկյան և Եվրասիա միջազգային համալսարանները, Մխիթար Սեբաստացի կրթահամալիրը, Միջազգային կրթության ամերիկյան խորհուրդները, Ֆինանսաբանկային քոլեջը և այլ կրթական հաստատություններ:
Միջոցառման կազմակերպիչ Ինֆորմացիոն տեխնոլոգիական ձեռնարկությունների միությունից «Առաջին լրատվականին» հայտնեցին, որ ԴիջիԹեք ցուցահանդեսն ունի քարոզչական նպատակ՝ մարդկանց ցույց տալու, որ ապագան տեխնոլոգիական զարգացման մեջ է: Միջոցառման ընթացքում հատուկ ուշադրություն է դարձվելու երիտասարդներին` փորձելով ապահովել նրանց ներգրավվածությունը կրթական տարբեր ծրագրերին: Այդ իսկ նպատակով կրթական հաստատությունները ցուցահանդեսին ներկայանալու են իրենց բոլոր ծրագրերով և նախաձեռնություններով:
Հայաստանի պետական ճարտարագիտական համալսարանի (պոլիտեխնիկ) պրոռեկտոր Ռ. Աղգաշյանի տեղեկացմամբ՝ Պոլիտեխնիկն այս տարի ցուցահանդեսում հանդես կգա առանձին տաղավարով՝ ներկայացնելով սեփական կրթական ծրագրերը, ինչպես նաև հատուկ բաժին կունենա «Նեյշընլ Ինսթրումենթս», «Մայքրոսոֆթ» և «Սինոփսիս» ընկերությունների տաղավարներում, որտեղ կներկայացվի ԲՈՒՀ-ի և տվյալ ընկերության համագործակցության արդյունքը։
Ցուցահանդեսի ընթացքում կազմակերպվելու է նաև տեխնոլոգիական ոլորտի աշխատանքի տոնավաճառ, որի շրջանակներում շուրջ 50 ընկերություններ կներկայացնեն իրենց թափուր աշխատատեղերը: Երիտասարդները հնարավորություն կունենան տեղում ծանոթանալ գործատուի հետ, գտնել իրենց որակավորմանը համապատասխան մասնագիտական աշխատանք, ընդգրկվել տարբեր գործատուների տվյալների բազայում` առաջիկայում աշխատանքի առաջարկ ստանալու ակնկալիքով:
