Իսրայելական MIG News-ի փոխանցմամբ՝ հանգստյան օրերին թուրք ցանցահենները հարձակում են գործել իսրայելական տասնյակ կայքերի վրա, սակայն պարզվել է, որ հարձակման ենթարկված իսրայելական կայքերը եղել են պաղեստինյան։ Խառնաշփոթությունն առաջացել է նրանից, որ թեև պաղեստինյան կայքերն օգտագործում են ps վերին մակարդակի դոմենը, սակայն հոսթինգի համար օգտվում են իսրայելական վեբ-սերվերներից։
Արդյունքում, թուրք ցանցահենների հարձակումներից տուժել են 70 պաղեստինյան կայքեր։ Թուրք ցանցահենները շատ ուշ են հասկացել իրենց սխալը. երբ կոտրել են այդ կայքերը և խաթարել դրանց աշխատանքը, նոր հասկացել են, որ դրանք պաղեստինյան կայքեր են։
Թուրք ցանցահեններն իրենց կոտրած կայքերի գլխավոր էջերում պատկերել են արյան մեջ թաթախված իսրայելցի զինվորի, ով փորձում է լվացվել ամերիկյան ծորակով։ Ցանցահենները նկարի տակ գրել են՝ «Որովհետև «Մավի Մարմարա»-ի միջադեպի վերաբերյալ հաշվետվության ժամանակ դուք քվեարկել եք Իսրայելի օգտին», «Մենք շրջափակել ենք այս կայքը», «Դու դեռ ներողություն կխնդրես Նեթանյահու», «Իսրայելը դեռ ներողություն կխնդրի»։
Բացի այդ, նրանք վիրավորական արտահայտություններ են հասցեագրել Իսրայելին, Հայաստանին, Հունաստանին և Թուրքիայում ահաբեկչական հռչակված ու արգելված «Քրդստանի աշխատավորական» կուսակցությանը (PKK)։
Հիշեցնենք, որ մեկ շաբաթ առաջ 1923 Turk-Grup հորջորջված թուրք ցանցահենների խումբը հարձակումներ է կազմակերպել Իսրայելի և եվրոպական երկրների 14,000 կայքերի վրա։
