Անկախության տարիների մեր առաջին ձեռքբերումը հենց անկախությունն է, երկրորդը՝ Արցախը, երրորդը՝ բանակը: Այս մասին այսօր հրավիրված ասուլիսի ընթացքում, շնորհավորելով անկախության քսանամյակի կապակցությամբ, նշեց գեներալ-մայոր Արկադի Տեր-Թադևոսյանը (Կոմանդոս): Նա չհամաձայնեց այն դիտարկմանը, թե մեր բանակը լավը չէ՝ նշելով, որ թերություններ իհարկե կան, որոնք ժամանակի ընթացքում կշտկվեն:
Խոսելով պատերազմի վտանգների մասին՝ Արկադի Տեր-Թադևոսյանն ասաց, որ ինքը՝ որպես զինվորական, ով շատ հաճախ է լինում Ղարաբաղում, կարող է ասել, որ Ադրբեջանը պատերազմի պատրաստ չէ: Իսկ պատերազմի մասին նրանց սպառնալիքները պարզապես բլեֆ են:
Ադրբեջանցիներն էլ պատերազմ չեն ուզում, քանի որ հասկանում են, որ դա միայն Ալիևյան կլանին է ձեռնտու:
Ինչ վերաբերում է, թե Հայաստանն այս առումով ինչ դիրքորոշում ունի, Տեր-Թադևոսյանը նշեց, որ ցանկացած երկիր էլ պատերազմ չի ուզում, բայց մենք պատրաստակամ ենք եղել և պատրաստակամ ենք պաշտպանելու մեր հայրենիքը: Նա անգամ պատրաստ է պատերազմի դեպքում կրկին զենքը ձեռքին պաշտպանել հայրենիքը:
Յուրաքանչյուր երկիր, որը ցանկանում է պատերազմ սկսել, ըստ Արկադի Տեր-Թադևոսյանի, պետք է ունենա եռանկյունի. «Առաջինը՝ դա հասարակությունն է, երկրորդը՝ բանակը և երրորդը՝ դա կառավարությունն է, այն քաղաքական ուժը, որը եկել է իշխանության»:
Հարցին՝ ղարաբաղյան խնդրում մեր իշխանությունները ճի՞շտ քաղաքականություն են տանում, թե՞ ոչ, պատասխանեց. «Վերջին շրջանում անհասկանալի քաղաքականություն էր վարվում, բայց վերջին 6-7 ամիսների ընթացքում, փառք Աստծո, հստակություն է մտցվել»:
Արկադի Տեր-Թադևոսյանի խոսքերով, ՀՀ երեք նախագահներն էլ ՀՀՇ-ից են եղել, նույն «պլատֆորմից են»: Հետևաբար, նա կարծում է, որ երեք նախագահների միջև ճեղքում տեղի ունեցավ Լեռնային Ղարաբաղի խնդրի պատճառով:
Միաժամանակ, նա համոզված է, որ եթե Լևոն Տեր-Պետրոսյանը չհամաձայներ, որ Ղարաբաղը լիներ Ադրբեջանի կազմում, ճեղքում չէր լինի: Եթե լիներ մի նախադասություն, որ ԼՂ անկախությունը ապագայում հնարավոր կլինի իրականացնել, ոչ մի ճեղքում էլ չէր լինի, տղաները միասին կլինեին:
