ՀՀ Ազգային Ժողովի «Քաղաքացիական պայմանագիր» խմբակցության պատգամավորների ու Երևանի քաղաքապետ Տիգրան Ավինյանի փակ հանդիպման ժամանակ քննարկվել է մայրաքաղաքին առնչվող հարցերի լայն շրջանակ, որի ընթացքում Տիգրան Ավինյանին անվստահություն հայտնելու կամ նրա հրաժարականը պահանջելու հարց չի քննարկվել։
Այդ մասին հայտնել է Երևանի քաղաքապետ Տիգրան Ավինյանը՝ ԱԺ «Քաղաքացիական պայմանագիր» խմբակցության պատգամավորների հետ ավելի քան չորս ժամ տևած փակ քննարկումից հետո։
Ավինյանի տեղեկացմամբ՝ հանդիպման ընթացքում քննարկվել է նաև բարեփոխումների մեծ ծրագիր, որը պետք է իրականացնի Երևանի քաղաքապետարանը, և այդ գործում ակնկալվում է նաև ԱԺ իշխող խմբակցության աջակցությունը։
«Մենք ուզում ենք համակարգային փոփոխություններ, հետևաբար պետք է էական ուշադրություն դարձնենք իրավական բոլոր փաստաթղթերին, որոնք մեր բոլորի գործունեության հիմքն են»,- ասել է Ավինյանը։
Հանդիպման ընթացքում պատգամավորները բարձրաձայնել են այն դժգոհությունները, որոնք ստացել են քաղաքացիներից, սակայն քննարկումն ավելի շատ ընթացել է ինստիտուցիոնալ խնդիրների և դրանց լուծման ուղիների շուրջ։ Մասնավորապես, հանգամանալից քննարկման առարկա են դարձել հանրային այգիների բարելավմանը, մայթերի վերականգմանը, հանրային տրանսպորտին, կայանատեղիների ռազմավարությանը, քաղաքացիների կենցաղային խնդիրներին և մի շարք այլ պրոբլեմներին վերաբերող հարցերը։
Անդրադառնալով իր պաշտոնանկության մասին շրջանառվող լուրերին՝ Ավինյանը վստահեցրել է, որ նման հարց չկա և չի քննարկվել ՔՊ պատգամավորների հետ հանդիպման ժամանակ։
«Քննարկված հարցերի շրջանակն ամբողջապես փակել է բոլոր այն խնդիրները, որոնք կան Երևան քաղաքում։ Քննարկվել են նաև ապագային վերաբերող հարցերը, որոնք բարձրաձայնվել են քաղաքապետարանի կողմից և որոնց լուծման համար կա նաև Ազգային Ժողովի աջակցության կարիքը»,- ասել է Ավինյանը։
