«Կամավորական շարժում» հասարակական կազմակերպության նախագահ Հրանտ Մարգարյանը այսօր Կոռնիձորում հրավիրած հանրահավաքից առաջ հանդիպել էր ՀՅԴ երիտասարդական միության անդամներին։
Անդրադառնալով հետպատերազմյան շրջանի զարգացումներին՝ Մարգարյանը նշել է՝ ժողովրդի մի մասը սկսեց պայքարել, որ այս իշխանությունը դավադիր է, դավաճան է և պետք է հեռանա, բայց ոչ ոք համարձակություն չունեցավ ասել, թե դրանից հետո ի՞նչ պետք է անենք: Մարգարյանը նշել է, որ դրանից հետո պետք է դիմադրել, պետք լինի՝ պետք է կռվել: Նա ասել է, որ Նիկոլի հեռացման դեմ պայքարը չի դադարում. «Ադրբեջանի դեմ պայքարն այս իշխանության դեմ պայքար է»:
Քրիստոնեա-ժողովրդավարական կուսակցության նախագահ, քաղաքագետ Լևոն Շիրինյանն «Առաջին լրատվական»-ի հետ զրույցում, անդրադառնալով Մարգարյանի այս հայտարարությանը, նշեց, որ Մարգարյանի ասածը ներքին ուժերի նոր էսկալացիայի մասին է, չնայած ներքին էսկալացիան միշտ զուգահեռ է եղել արտաքինի հետ։ Քաղաքագետի խոսքով՝ իշխանության փոփոխություն պետք է լինի միայն ընտրությունների ճանապարհով, որևէ այլ տարբերակ ընդունելի չէ․ Հայաստանը պետք է զարգանա սահմանադրականության շրջանակներում, իսկ սա նշանակում է հերթական խորհրդարանական ընտրություններին այլընտրանք չկա, ընդ որում՝ վաղաժամկետ ընտրությունների համար ևո որևէ հիմք չկա։
«Մենք պետք է կռվենք, իսկ մեր կռիվը պետք է լինի ռուս-ադրբեջանական դաշինքի դավադրությունների դեմ, իսկ ներքին իմաստով էլ պետք է դեմոկրատական ընթացակարգը պահենք 100 տոկոսով»,-ասաց նա։
Շիրինյանը վստահ է՝ նրանց ցանկությունը չի լինելու, քաղաքացու քվեն է որոշիչ լինելու։ Նորմալ պետությունները կայանում են ընտրությունների ճանապարհով, իսկ իշխանությունը պարտավոր է ապահովել ընտրություններին բացարձակ մաքություն՝ թույլ չտալով արտաքին ուժերին միջամտել, լինի Արցախից, թե այլ տեղից։
«Պետք է օտար ուժերի ներգործությամբ ընտրություն կազմակերպելը բացառել, իսկ դա հիմնականում անում է Ռուսաստանը։ Մենք երկիրը պետք է պատրաստենք նորմալ ընտրությունների, որ նախ երկրի զարգացումն ապահովենք, երկրորդ՝ ժողովրդավարական պետությունների համակրանքը շահենք։ Ամեն դեպքում վատ է, որ փոխանակ ուրիշ կարևոր բաներով զբաղվեն, երկիրը շենացնելու ուղղությամբ աշխատեն, ոչ թե նման օրակարգեր առաջ քաշել»,-ասաց նա։
Հայաստանում իշխանափոխություն Լևոն Շիրինյանը բացառում է։ Արցախի պարագայում այլ է։ Ըստ նրա՝ Սամվել Բաբայանին պետք է տան Պետնախարարի պաշտոնը․
«Ասել եմ և կրկնում եմ՝ Սամվել Բաբայանին հանձնել պետնախարարի պաշտոնը։ Եթե Թաթարստանից մեկը գործուղվում է Արցախ և զբաղեցնում այդ կարևոր պաշտոնը, ապա Սամվել Բաբայանը միանշանակ իրավունք ունի այդ պատշոնը զբաղեցնելու։ Իհարկե, Բաբայանը Ղարաբաղյան կլանին ձեռնտու չէ, բայց Արայիկ Հարությունյանը պետք է դրան գնա, քանի որ դա Արցախի ծաղկման գրավականն է, անհրաժեշտություն է գիտելիքներով գեներալի վերադաձը։ Բայց իհարկե վախ ունեն Բաբայանից, իհարկե, ղարաբաղյան կլանը չի ուզենա Սամվել Բաբայանի վերադարձը, բայց պետք է ոտքի կանգնել, Արայիկ Հարությունյանը պետք է գնա այդ քայլին»,-հավելեց քաղաքագետը։
