«Կրպակատերերը փոքր բիզնեսի ներկայացուցիչներ են համարվում, այն փոքր թիվը, որ կա ՀՀ-ում՝ է՛լ ավելի կպակասի, իսկ կրպակների ապամոնտաժումը գործող իշխանությունների քաղաքական նպատակն է եղել, որպեսզի ՀՀ քաղաքացիներին կարողանան զրկել անկախությունից, սեփական գործունեությունից, անկախ ապրելուց»,- այս մասին «Առաջին լրատվականի» հետ զրույցում ասաց Երևանի նախկին քաղաքապետ, տնտեսագետ Վահագն Խաչատրյանը:
«Կունենանք օլիգարխներ և հեշտ կառավարելի օլիգարխիկ տնտեսություն, ովքեր իրենց քաղաքական քայլերը կարող են իրականացնել ուղղակի և անուղղակի իմաստով: Ուղղակին նկատի ունեմ այն, ինչ կատարվեց մարտի 1-ին, իսկ անուղղակին այն, ինչը կոչվում է կոռուպցիա, կաշառակերություն: Համոզված եմ, որ այդ խնդիրն է դրված, այլ բացատրություն չկա: Սուպերմարկետները դրա շարունակությունն են, ի վերջո՝ այն մարդիկ, ովքեր զբաղված էին իրենց սեփական գործով, պետք է այժմ աշխատանք փնտրեն և դառնան սուպերմարկետների տերերի ծառաները»,- պարզաբանեց նախկին քաղաքապետը:
«Եվ երբ Սերժ Սարգսյանն ասաց, թե ի՞նչ վատ բան կա դրա մեջ, ասեմ, որ շատ վատ բան կա, երբ մարդն ունի իր սեփական գործը դա ուրիշ բան է, այլ բան է, երբ նա ուրիշի մոտ է աշխատում: Սա ես համարում եմ քաղաքական ծրագիր և նպատակ, քան սովորական կրպակ փակել կամ Երևանի արտաքին տեսքի վերականգնում, այս ամենը կեղծ է և չի համապատասխանում իրականությանը»,- եզրափակեց Վ.Խաչատրյանը:
