Իսրայելական Mig News-ի փոխանցմամբ՝ հնագետները սենսացիոն հայտնագործություն են կատարել Վրաստանի Բորժոմիի լեռնանցքում։ Այնտեղ հայտնաբերվել են հսկա մարդկանց ոսկորներ, որոնք ունեն 25,000 տարվա վաղեմություն։ Գիտնականները վստահեցնում են, որ այդ հսկա մարդկանց հասակը կազմել է 2.5-3 մետր։
Վրաստանի գիտությունների ակադեմիայի ակադեմիկոս Աբեսալոմ Վեկուան կարծում է, որ այս հայտնագործությունը կարող է սենսացիոն լինել, քանի որ գիտական շրջանակներում վաղուց քննարկվում էր տասնյակ հազարավոր տարիներ առաջ Եվրասիայի մի շարք շրջաններում բնակված հսկա մարդկանց գոյության հարցը։
Նա ուշադրություն է հրավիրել հայտնաբերված ազդոսկրի վրա, որն իր մեծությամբ ու հաստությամբ տարբերվում է ժամանակակից մարդու ազդոսկրից. «Այդ մարդիկ ապրել են մնացյալ քաղաքակրթությունից առանձին, ինչի համար էլ տարբերվել են իրենց հասակով։ Գիտական գրականության մեջ նրանք հիշատակված են որպես հսկաներ, սակայն մինչ այս այդ հիպոթեզի փաստագրական ապացույցներ չկային։ Այդպիսով, մենք կանգնած ենք սենսացիայի նախաշեմին»։
