Վաշինգտոնը շարունակում է աշխատել բազմաթիվ հումանիտար հարցերի լուծման ուղղությամբ, այդ թվում՝ ռազմագերիների վերադարձի, անհետ կորած անձանց ճակատագրերի պարզման և այլն, երեկ ասել է ԱՄՆ Պետքարտուղարի Եվրոպական ու Եվրասիական հարցերով փոխտեղակալ Էրիկա Օլսոնը՝ Վաշինգտոնում Հայաստանի մարդու իրավունքների պաշտպան Քրիստիննե Գրիգորյանի հետ հանդիպման ժամանակ։
Ըստ ՄԻՊ գրասենյակի՝ Պաշտպանը ներկայացրել է այն դժվարություններն ու ապրումները, որով անցնում են գերիների ընտանիքները՝ նկատի ունենալով նաև տեղեկատվական սադրիչ միջավայրը, որը ստեղծվում է ադրբեջանական կողմից։
Քրիստիննե Գրիգորյանը փոխտեղակալին ներկայացրել է արտահերթ զեկույցները, որոնցում փաստագրված և վերլուծված են սեպտեմբերի 13-14-ին ադրբեջանական հարձակման ընթացքում ու դրանից հետո տեղի ունեցած մարդու իրավունքների շարունակական խախտումները, հարձակման ենթարկված համայնքներում ապրող մարդկանց հումանիտար խնդիրները, պատերազմական հանցագործության փաստերը՝ կարևորելով կատարված հանցանքների համար պատասխանատուների պատասխանատվության ու պատժի անխուսափելիության հարցը՝ անկախ նրանից, թե ինչ ազգություն ունի հանցագործը, ասված է ՄԻՊ հաղորդագրությունում։
