Ֆրանսիայի գործերի ժամանակավոր հավատարմատար Ժուլիեն Լե Լանը կանչվել է Ադրբեջանի ԱԳՆ, նրան բողոքի նոտա են ուղղել՝ կապված նախօրեին Ֆրանսիայի Ազգային ժողովի կողմից ընդունված հակաադրբեջանական բանաձեւի հետ։ Այս մասին հայտնում են ադրբեջանական ԶԼՄ-ները։
Նշվում է, որ հանդիպման ընթացքում նրա ուշադրությունն են հրավիրել այն հանգամանքին, որ Ֆրանսիայի Ազգային ժողովում ընդունված բանաձևը, ինչպես նաև նոյեմբերի 15-ին Սենատում ընդունված բանաձևը «Ֆրանսիայի հերթական սադրանքն են Ադրբեջանի դեմ»։
Ադրբեջանական կողմը նշել է, որ «այս բանաձևը, ինչպես բաև Ֆրանսիայի մի շարք այլ քայլերով փորձ է արվում հարված հասցնել Ադրբեջանի և Հայաստանի միջև հարաբերությունների կարգավորման գործընթացին, ինչպես նաև տարածաշրջանում խաղաղության հաստատման ջանքերին»։
Հանդիպման ընթացքում ընդգծվել է, որ բանաձևի լսումներին Ֆրանսիայի կառավարության ներկայացուցչի հայտարարությունները հստակ ցույց են տվել, որ «այս բանաձևի հետևում կանգնած է Ֆրանսիայի կառավարությունը, և որ այս երկիրը չի կարող արդար և չեզոք միջնորդի դերում հանդես գալ»։
Ադրբեջանում Ֆրանսիայի գործերի ժամանակավոր հավատարմատարը նշել է, որ Փարիզն աջակցում է Ադրբեջանի և Հայաստանի միջև հարաբերությունների կարգավորման գործընթացներին և, ըստ ադրբեջանական ԶԼՄ-ների, նա հավելել է, որ ադրբեջանական կողմի դիրքորոշումը կփոխանցի ֆրանսիացի պաշտոնյաներին։
