Ադրբեջանի փոխվարչապետ Շահին Մուստաֆաևն անդրադարձել է հայ-ադրբեջանական սահմանին երեք անցակետ տեղադրելու՝ ՀՀ կառավարության նախաձեռնությանը. «Հայաստանի կառավարության որոշումը՝ Ադրբեջանի հետ սահմանին 3-րդ անցակետ ստեղծելու մասին, մենք գնահատում ենք որպես 2020 թվականի նոյեմբերի 9/10-ի եռակողմ հայտարարության 9-րդ կետով պարտավորությունների կատարման իմիտացիա»։
Նրա խոսքով՝ այդ կետերից եկող ճանապարհները՝ ռելիեֆով և կլիմայական պայմաններով, տարվա մեծ մասը պիտանի չեն Նախիջևանի հետ տրանսպորտային հաղորդակցության և, առավել ևս, միջազգային տարանցիկ փոխադրումների համար. «Բացի այդ, որպես կանոն, անցակետերը բացվում են կողմերի համաձայնությամբ՝ հայելային, իսկ Ադրբեջանի հետ այդ առումով որևէ համաձայնություն չի եղել։ Ուստի Ադրբեջանի արևմտյան շրջանների և Նախիջևանի միջև տրանսպորտային հաղորդակցությանը վերաբերող 9-րդ կետի պայմանները չկատարելու գլխավոր պատճառը Հայաստանի դժկամությունն է՝ ներկայացնել նույն մոնիթորինգի կողմից առաջարկված ավտոմոբիլային ճանապարհի օպտիմալ երթուղին»։
Նա նաև հայտարարել է, որ թեմայի շուրջ շահարկումը և հայկական կողմի իմիտացիան խեղաթյուրում է 20-ամսյա բանակցային գործընթացի էությունը, հանգեցնում է դրա ձգձգմանը և, ի վերջո, «Հայաստանի կողմից իր պարտավորությունների չկատարմանը»։
