Expert.ru-ի փոխանցմամբ՝ Թուրքիայի Անթալիայի նահանգի Ալանիա շրջանի Alara հյուրանոցում վերջին երկու շաբաթվա ընթացքում թունավորվել է Ռուսաստանից ժամանած ավելի քան 100 զբոսաշրջիկ։ Այս մասին հայտարարել է Ингосстрах ապահովագրական ընկերությունը։
Օգոստոսի 15-29-ին թունավորման բողոքներով Ингосстрах-ի ծառայողական կենտրոն է դիմել 103 մարդ։ Բոլոր տուժյալները ստացել են բուժօգնություն, որոշ զբոսաշրջիկներ ցայժմ բուժում են ստանում։ Տուժյալներին հատկացվող օգնությունը ցուցաբերվում է մինչև 15,000 դոլարի սահմանափակմամբ ապահովագրական ծրագրի շրջանակներում։
Թուրքական կողմը, սակայն, հերքում է այդ մեղադրանքները։ Տարվում է հետաքննություն։ Գործին միջամտել է նաև Անթալիայում գտնվող ռուսական հյուպատոսարանը։
Հիշեցնենք, որ այս տարի Թուրքիայում հանգստացող ռուս զբոսաշրջիկների բախտն ընդհանրապես չի բերում։ Այս տարվա մայիսի վերջին Հյուսիսային Կիպրոսից բերված անորակ ալկոհոլի պատճառով Բոդրում հանգստավայրում թունավորվել էին մի շարք ռուս զբոսաշրջիկներ, որոնց մի մասը մահացել էր։
