Մեկնաբանելով երեկ մամուլում տեղ գտած այն տեղեկությունը, ըստ որի՝ այս ուսումնական տարվանից Կապանում գործելու է ռուսերեն լեզվով դասավանդմամբ հանրակրթական գիմնազիա՝ 1-4-րդ դասանների համար՝ «Մենք դե՛մ ենք օտարալեզու դպրոցների վերաբացմանը» նախաձեռնության անդամ Արմեն Հովհաննիսյանն ասաց, որ դրանից առաջ՝ հունիսի 29-ին, Սյունիք կատարած այցի ժամանակ ՀՀ-ում ՌԴ արտակարգ և լիազոր դեսպան Վյաչեսլավ Կովալենկոյի և Սյունիքի մարզպետ Սուրիկ Խաչատրյանի միջև ստորագրվել էր մի փաստաթուղթ, որը բողոքի մեծ ալիք էր բարձրացրել:
«Այն ժամանակակ կրթության և գիտության նախարարությունը մամուլի հարցադրումներին պատասխանեց, որ մարզպետն այդպիսի իրավասություն չունի, և որ դա ընդամենը բարի ցանկությունների արձանագրություն է եղել: Օտարալեզու դպրոցը բացելու որոշումն արվում է միայն կառավարության մակարդակով»,- ասաց Ա. Հովհաննիսյանը՝ ընդգծելով, թե հիմա դժվար է ասել՝ ի՞նչ փոփոխություններ են արվել, ի՞նչ փաստաթղթի մասին է խոսքը, այդ իսկ պատճառով որոշվել է այսօր պաշտոնապես դիմել կառավարությանը, կրթության և գիտության նախարարությանն ու պարզաբանում պահանջել»:
«Ամեն դեպքում, եթե դա նույնիսկ կառավարության որոշումն է, լինելու են բողոքի տարաբնույթ գործողություններ, որովհետև այս դեպքում ևս դա սկզբունքորեն անընդունելի է, բայց իրավական կողմը մենք նույնպես ուզում ենք ճշտել»,- նշեց նախաձեռնության անդամը:
Չի բացառվում, որ դպրոցը նախատեսված լինի ազգությամբ ոչ հայ քաղաքացիների կամ ազգությամբ հայ, բայց ոչ ՀՀ քաղաքացիների համար, ինչի իրավունքը երկու խումբն էլ, ըստ ՀՀ օրենսդրության, ունեն:
Ինչ վերաբերում է ՀՀ հայ քաղաքացիներին, ապա մինչև 2011 թ. հունվարը գործող Լեզվի մասին և Հանրակրթության մասին օրենքների համաձայն՝ նրանք պետք է հաճախեին բացառապես հայերեն լեզվով դասավանդմամբ հանրակրթական ուսումնական հաստատություններ: Համաձայն նախորդ տարվա վերջում ընդունված «Հանրակրթության մասին» օրենքում աղմկահարույց փոփոխությունների՝ «Ուսումնական հաստատությունները կարող են միջազգային ծրագրեր իրականացնել և օտար լեզուներով կրթություն կազմակերպել բացառապես Հայաստանի Հանրապետության կառավարության որոշումով։ Ուսումնական հաստատությանը օտար լեզվով կրթություն կազմակերպելու թույլտվություն տալու կարգը մշակում է կրթության պետական կառավարման լիազորված մարմինը և ներկայացնում Հայաստանի Հանրապետության կառավարության հաստատմանը։
Օտար լեզվով կրթական ծրագրեր կարող են իրականացնել բացառապես ոչ պետական ուսումնական հաստատությունները, ինչպես նաև միջպետական, միջկառավարական համաձայնագրերով ստեղծված ուսումնական հաստատությունները»: Բացի այդ, սահմանվում են հստակ սահմանափակումներ՝ ոչ ավելի, քան 9 այդպիսի հաստատություն և միայն ավագ դպրոցում:
