«Առաջին լրատվական»-ի զրուցակիցն է ուկրաինահայ վերլուծաբան Մարատ Հակոբյանը։
–Պարոն Հակոբյան, ՌԴ Պետդումայի պաշտպանության կոմիտեի ղեկավար Անդրեյ Կարտապոլովը չի բացառում, որ Հավաքական անվտանգության պայմանագրի կազմակերպության (ՀԱՊԿ) խաղաղապահ ուժեր ուղարկվեն «Լուգանսկի և Դոնեցկի հանրապետություններ»-ի և Ուկրաինայի «ազատագրված տարածքներ»։ Ի՞նչ դիտարկումներ ունեք այս հայտարարության շուրջ, ինչքանո՞վ է նման հեռանկարը հնարավոր։
-Սա անադեկվատ մարդու բացարձակ անհեթեթ հայտարարություն է։ Միակ բանը, որ Կրեմլը պետք է անի՝ հնարավորինս շուտ դուրս գալն է Ուկրաինայի ժամանակավոր օկուպացված տարածքներից և սկսի փոխհատուցել այն վնասը, որը ագրեսոր երկիրը հասցրել է Ուկրաինային։ Սա Ուկրաինայի և միջազգային հանրության դիրքորոշումն է, մնացած բոլոր «տարբերակները» մոսկովյան ռեժիմի հիվանդագին ֆանտազիայի ժանրից են։
–Առաջիկա օրերին սպասվում է ՀԱՊԿ ԱԳ նախարարների այցը Երևան։ Չավարտվող պատերազմի ֆոնին, հնարավո՞ր է Ռուսաստանը ՀԱՊԿ անդամ երկրների աջակցության կարիքն ունենա և ի՞նչ հնարավորություն ունի Հայաստանը դա մերժելու հարցում։
– Հայաստանը պետք է խստորեն պահպանի միջազգային իրավունքի կանոնները։ Ոչ ոք չի կարող ստիպել պաշտոնական Երևանին գործել ի վնաս սեփական շահերի։ Հայաստանի Հանրապետությունը չի կարող «դաշնակից» ձևացող բռնակալի քմահաճույքով վտանգել իր ինքնիշխանությունը։ Իսկ պատերազմը տեղափոխվել է երկրորդ փուլ, որը կարող է ավելի ձգձգվել։ Ուկրաինական զորքերն ամբողջությամբ դուրս են մղել զավթիչներին Կիևի, Ժիտոմիրի, Չեռնիգովի և Սումիի շրջաններից և ազատագրել Խարկովի շրջանի երկու երրորդը։ Ազատման ենթակա են Խերսոնը, Զապորոժյեի, Խարկովի և Դոնեցկի շրջանների մի մասը, Լուգանսկի շրջանի մեծ մասը, ինչպես նաև Ղրիմի Ինքնավար Հանրապետության տարածքը։ Շատ ժամանակ կպահանջվի, բայց մենք այլ սցենար չունենք, քան երկիրը թշնամուց ամբողջությամբ մաքրելը։
Ռուսաստանում ԱՄՆ դեսպան Ջոն Սալիվանի կարծիքով՝ ռուս-ամերիկյան արդյունավետ հարաբերությունների վերականգնում և հաշտեցում մոտ ապագայում դժվար տեղի ունենա։ Միևնույն ժամանակ նա նշել է, որ սխալ կլինի փակել ԱՄՆ դեսպանատունը Ռուսաստանում։ Դուք մոտ ապագայում հարաբերությունների բարելավում կանխատեսու՞մ եք, եթե ոչ, ապա փոքր երկրները՝ ինչպիսին Հայաստանն է ինչքանով կարող է այս պատերազմից անմասն մնալ։
-Ջոն Սալիվանը իրավացի է, քանի դեռ շարունակվում է Ռուսաստանի Դաշնության ագրեսիան Ուկրաինայի դեմ, միամտություն է այդ երկրի հետ նորմալ հարաբերություններ սպասել արևմտյան երկրներից։ Դա կշարունակվի մինչև պատերազմի ամբողջական դադարեցումը, ուկրաինական տարածքների ազատագրումը և պատերազմի բոլոր հետևանքների վերացումը։ Մոսկվան պետք է պատասխան տա Ուկրաինայի դեմ ագրեսիայի, ուկրաինացի ժողովրդի դեմ իրականացված ցեղասպանության համար. Ինչ վերաբերում է Հայաստանին, ապա իշխանությունների խնդիրն ամենևին էլ այն չէ, որ երկիրը ներքաշվի Մոսկվայի թե՛ ռազմական, թե՛ տնտեսական արկածախնդրության մեջ։ Ոչ մի վայրկյան չպետք է մոռանալ, որ Ռուսաստանի Դաշնությունը գտնվում է արևմտյան պատժամիջոցների տակ, սա միջազգային քաղաքականության կարևոր բաղադրիչ է։
