Հայաստանում բաց բաժնետիրական ընկերությունները (ԲԲԸ) շատ քիչ են: Օրինակ` «ՆԱՍԴԱՔ ՕԷՄԷՔՍ Արմենիա»-ի բորսայական ցուցակներում ընդգրկված և բորսայական առևտրին թույլատրված են 10 բաց բաժնետիրական ընկերությունների արժեթղթեր: Ըստ այդմ՝ երկրում ունեցվածքի կապիտալիզացիայի հնարավորությունը շատ փոքր է:
ForexClub ակումբի վերլուծաբան Միքայել Վերդյանն «Առաջին լրատվականի» հետ զրույցում հայտնեց, որ այսօր ՀՀ-ում կա ներդրման հնարավոր 2 տարբերակ՝ բանկերում դեպոզիտների և պետական պարտատոմսերի տեսքով, որոնք սակայն ունեն բավականին ցածր տոկոսադրույք և ցուցակված են դրամով, ինչն իր հերթին մեծ ռիսկեր է ստեղծում՝ հատկապես հաշվի առնելով գնաճային ճնշումները, որ մեր երկրում բավականին բարձր են, և եկամտաբերությունը միանգամից ընկնում է:
«Դա շատ կարևոր խնդիր է: Բորսայում պետք է ցուցակվեն բավականին շատ թվով կորպորատիվ արժեթղթեր, որտեղ քաղաքացին կկարողանա իր իսկ ընտրությամբ ներդրումներ կատարել: Միևնույն ժամանակ մեր բորսայում կան ցուցակված կորպորատիվ պարտատոմսեր, որոնք նույնպես ներդրումային լուրջ գործիքներ են, թեև դրանք փոքր ներդրողներին այնքան էլ հետաքրքիր չեն, քանի որ պարտատոմսերի եկամտաբերությունը բավականին ցածր է, ինչը եկամտաբերությունը դնում է ռիսկի տակ»,- ասաց Մ. Վերդյանը:
Ըստ նրա՝ շատ կարևոր է, որ ԲԲԸ-ները իրականում լինեն բաց, ցուցակվեն բորսայում: Դա ևս մի դրական հետևանք կունենա, որովհետև կազմակերպություններն իրենց գործունեությունը լիովին կբերեն օրինական դաշտ, ու դրանով կլուծվի ստվերային տնտեսության խնդիրը, կստեղծվեն հնարավոր ներդրումային գործիքներ, որոնցից կօգտվեն մեր քաղաքացիները: «Սա արագ լուծվող հարց չի: Երկար, աշխատատար, ժամանակատար հարց է, որ պետք է լուծվի»,- նշեց Մ. Վերդյանը:
Վերլուծաբանը քաղաքացիների ուշադրությունը հրավիրեց վերջերս տարածված թանկարժեք մետաղներով հաշիվներին: Նրա կարծիքով՝ հաշվի առնելով համաշխարհային բավականին բարդ ֆինանսատնտեսական վիճակը, այսօր թանկարժեք մետաղները, մասնավորապես՝ ոսկին, բավականին լուրջ գնային աճ են ցուցադրում միջազգային շուկաներում, և եկամուտ կարելի է ստանալ՝ ներդնելով ոսկով արտահայտված հաշիվներում, որոնք բանկերն այսօր առաջարկում են: «Դա թե՛ պաշտպանված և թե՛ եկամտաբեր է այս պահին»,- ընդգծեց Մ. Վերդյանը:
