Պաշտոնապես Մուամար Քադաֆին դեռ չի թողել իշխանությունը, սակայն Արևմուտքի շատ երկրներ շտապում են լիբիական ապստամբներին առաջարկել իրենց օգնությունը՝ երկրի տնտեսության վերականգնման համար` շահավետ պատվերների հույս ունենալով իրենց կոնցեռնների համար: Այսպես, ԱՄՆ նախագահ Բարաք Օբամայի աշխատակազմը միջոցներ է փնտրում Քադաֆիի և նրա համախոհների սառեցված բանկային հաշիվներից 1.5 մլրդ դոլար հանելու համար: Սա մոտավորապես գնդապետի` ԱՄՆ-ում գտնվող մարդկանց պատկանող միջոցների կեսն է:
Ներկա դրությամբ Տրիպոլիի իշխանությունների և Քադաֆիի դեմ ՄԱԿ-ի պատժամիջոցները, որոնք նախատեսում են Լիբիայի արտասահմանյան ակտիվների մուտքի արգելափակում, դեռ շարունակում են գործել: Եվ հիմա ԱՄՆ-ը և Եվրոպան փորձում են կանոնակարգել իրավաբանական հարցերը, որպեսզի հաղթող ապստամբների ղեկավարներին տրվի մուտքի իրավունք դեպի այդ միջոցները:
Արևմտյան առաջնորդները, սակայն, մտահոգված են ոչ միայն Լիբիայի բնակչության բարեկեցությամբ, նրանք ձգտում են ապահովել իրենց արդյունաբերության համար առավելագույն շահավետ պայմանագրեր: Ի դեպ, Ֆրանսիան արդեն հասկացնել է տալիս, որ հակված է առաջատարի դերին, քանի որ ԱՄՆ-ից հետո ամենամեծ ներդրումն ունի Քադաֆիի ռեժիմի տապալման գործում: Գերմանիան իր հերթին հույս ունի, որ շահավետ պատվերների բաժանման ժամանակ չի պատժվի այն բանի համար, որ հրաժարվել է մասնակցել Քադաֆիի դեմ զինվորական գործողություններին:
