ՄԱԿ-ի Արդարադատության միջազգային դատարանը օրերս բավարարել է Ուկրաինայի հայցն ընդդեմ Ռուսաստանի, կայացրել է որոշում միջանկյալ միջոցների կիրառման վերաբերյալ։ Մասնավորապես, դատարանը պահանջում է ՌԴ-ից անմիջապես վերջ դնել ռազմական գործողություններին, ինչպես նաև պահանջում է ապահովել, որպեսզի իր կողմից վերահսկվող ոչ կանոնավոր ջոկատները և կազմակերպությունները զերծ մնան հետագա ռազմական գործողություններից։
Ուկրաինայի նախագահ Վլադիմիր Զելենսկին արդեն իսկ ողջունել է դատարանի որոշումը՝ նշելով, որ Ուկրաինան ամբողջական հաղթանակ տարավ Արդարադատության միջազգային դատարանում:
Հիշեցնենք, որ Ուկրաինան շաբաթներ առաջ դիմել էր ՄԱԿ-ի Արդարադատության միջազգային դատարան Ցեղասպանության հանցագործության կանխարգելման և դրա համար պատժի վերաբերյալ կոնվենցիայի շրջանակներում ցեղասպանության մեղադրանքների առնչությամբ։
Հաագայի դատարանի այս որոշումը միանշանակ չի ընդունվում փորձագետների կողմից, հնչում են տեսակետներ, որ դատարանը վերազանցել է իր լիազորությունները և քաղաքական որոշում է կայացրել:
Այս առնչությամբ Վենետիկի հանձնաժողովում Հայաստանի երկրորդ փոխարինող անդամ, միջազգային իրավունքի մասնագետ Արա Խզմալյանը «Առաջին լրատվական»-ի հետ զրույցում նշեց. «Ես ևս այն կարծիքին եմ, որ միջազգային դատարանը դուրս է եկել իր իրավազորության շրջանակներից, քանի որ Ցեղասպանության կանխարգելման կոնվենցիայի համաձայն դատարանը նման որոշում կայացնելու իրավական հիմք չուներ: Այսինքն այդ որոշումը հիմնավորված չէ իրավական տեսանկյունից, և այնտեղ քաղաքական տարրեր կան: Եթե ժամանակ տրամադրենք ու կարդանք, կտեսնենք, որ այդ որոշմանը կողմ քվեարկած դատավորը, ըստ էության, նշում է, որ որոշումը սխալ է, բայց ինքը կողմ է քվեարկում»:
Նա ընդգծեց, որ ինքն, իհարկե, ճիշտ է համարում, որ պետք է անհապաղ Ռուսաստանի կողմից դադարեցվեն ռազմական գործողությունները, պատերազմը, բայց դատարանի կողմից նման որոշումն ուղղակի դատարանի հեղինակազրման խնդիր է առաջացնում. «Եթե դատարանն այդ աստիճան քաղաքականացվում է, հետագայում իր որոշումները հարգելու տեսանկյունից խնդիր է առաջացնում, իսկ դա նաև մեզ որպես պետություն պետք է անհանգստացնի, քանի որ մենք Ադրբեջանի դեմ հայց ենք ներկայացրել, ակնկալում ենք դրական որոշում: Այդ առումով դատարանի հեղինակազրկումը մեզ բոլորովին ձեռնտու չէ»,-ասաց Արա Խզմալյանը:
Դիտարկմանը, որ եթե նույն տրամաբանությամբ առաջնորդվի դատարանը, ապա Ադրբեջանն արդեն իսկ պետք է ագրեսոր պետություն ճանաչված լիներ, նա արձագանքեց. «Մի սխալն իրականությունը չի փոխում: Այս դեպքում կայացվել է քաղաքական որոշում: Դա չի նշանակում, որ դատարանը պետք է աներ մի բան, որը չի արել Ադրբեջանի դեմ: Հայաստանի հայցերով դատարանի որոշումները հիմնավորված էին, ակնկալելի էին, ողջամիտ էին: Այն, որ դատարանը սխալ չի վարվել այն ժամանակ, իսկ հիմա սխալ է վարվել, դա չի նշանակում, որ այն ժամանակ էլ պետք է սխալ վարվեր»:
Ինչ վերաբերում է նրան, թե արդյոք Ռուսաստանը այսպես միանշանակ ընդունելու է դատարանի պահանջները, ի՞նչ ուժ է ունենալու դատարանի որոշումը, Արա Խզմալյանն ասաց. «Հենց դա նկատի ունեմ, երբ խոսում եմ դատարանի հեղինակազրկման մասին: Ակնհայտ է, որ Ռուսաստանը Հաագայի դատարանի պահանջը չի կատարում: Որոշումը կա, բայց ռազմական գործողությունները շարունակվում են: Բնականաբար, ինչ-որ պահի ռազմական գործողությունները կդադարեն, բայց ակնհայտ է, որ որոշումն արդեն իսկ կատարված չէ և շարունակում է չկատարվել: Իհարկե, այստեղ առաջնայինը ոչ թե Ռուսաստանի վարքագիծն է, այլ այն, որ որոշումն ինքնին խնդրահարույց է»:
Նա նաև հավելեց, որ սա այն դեպքը չի, որ կարիք կա Հայաստանի կողմից որևէ դիրքորոշում հայտնելու:
