Ինչպես հաղորդում է Եգիպտական «ՄԵՆԱ» գործակալությունը, այսօր գիշերը Իսրայելի և Եգիպտոսի սահմանին սպանվել են եգիպտացի երկու ոստիկաններ: Որոշ տվյալներով նրանք զոհվել են իսրայելական ռազմաօդային ուժերի հարձակման հետևանքով, սակայն տեղեկություններ են ստացվում նաև այն մասին, որ ոստիկաններին սպանել են գրոհայինները:
Եգիպտական լրատվամիջոցները խոսում են այն մասին, որ ոստիկանները սպանվել են Իսրայելի կողմից, երբ հետապնդում էին երեկ Իսրայելում տեղի ունեցած 3 ահաբեկչություններին մասնակցած գրոհայինների:
Միաժամանակ BBC Arabia հեռուստաընկերության տվյալներով՝ եգիպացի ոստիկանները զոհվել են անհայտ գրոհայինի հարձակման հետևանքով: Եգիպտական բանակի ներկայացուցիչը հայտնել է, որ Իսրայելը ոչ մի կապ չունի այս սպանությունների հետ:
Ավելի վաղ տեղեկություններ էին ստացվել այն մասին, որ ի պատասխան երեկ տեղի ունեցած ահաբեկչությունների Իսրայելը ռմբակոծել է Գազայի հատվածը` սպանելով 6 մարդու, այդ թվում՝ մեկ երեխայի:
Հիշեցնենք, որ երեկ Էյլաթ նավահանգստի մոտակայքում տեղի էին ունեցել ահաբեկչություններ, գրոհայինները հարձակվել էին ավտոբուսի վրա, այնուհետեև մեկ այլ վայրում հակատանկային հրթիռով մեքենա էր պայթեցվել: Զոհվել է առնվազն 7 մարդ:
Իսրայելի պաշտպանության նախարար Էհուդ Բարաքը ահաբեկչությունների համար մեղադրել էր Գազայի հատվածի գրոհայիններին, իսկ ահա երկրի վարչապետ Բենյամին Նեթանյահուն հայտրարարել էր, որ ոչ մի ահաբեկիչ անպատիժ չի մնա և որ Իսրայելը կստիպի նրանց մեծ գին վճարել իրենց գործողությունների համար:
