«Վայրի բնության ու մշակութային արժեքների պահպանման հիմնադրամ»-ի (FPWC) թիմը բաց նամակ է հղել Արենի համայնքի ղեկաավրին և ավագանու անդամներին՝ հայտնելով մտահոգություն համայնքի ղեկավարի նոյեմբերի 16-ի որոշման առնչությամբ, որը վերաբերում է Գնիշիկ բնակավայրի որոշ տարածքներ մրցույթով վարձակալությամբ հատկացնելուն։
«Առաջին լրատվական»-ը, խնդրի շուրջ զրուցել և պարզաբանում է ստացել, Արենի համայնքի ղեկավար Հուսիկ Սահակյանից։
Ըստ Հուսիկ Սահակյանի, Գնիշիկ բնակավայրի այն տարածքները, որոնք հայտարարված են վարձակալությամբ հատկացնելուն, այս պահին ոչ մի ընկերության կողմից չեն օգտագործվում։ Սակայն այն նախկինում վարձակալության հիմունքներով տրվել է «Բեզոար» բնապահպանական հիմնադրամին, որն էլ այս պահին միակ մրցույթին հայտ ներկայացրած ընկերությունն է։
Համայնքապետարանն ավագանիների խորհրդով վարձակալության գումար է սահմանել և հայտարարել վարձակալության մրցույթ։
«Մրցույթ է հայտարարվել, և յուրաքանչյուր ոք, ընկերություն կարող են գալ և մասնակցել մրցույթին։ Ի՞նչու այդ «Բաց նամակ» գրող ընկերությունը չի ներկայացրել հայտ մրցույթի մասնակցության, և մի բան էլ գրում է գաղափարական տարաձայնությունների մասին»,- «Առաջին լրատվական»-ի հետ զրույցում ասաց համայնքապետը։
Կազմակերպության թիմի կարծիքով մրցույթում առկա են ՀՀ իրավական նորմերին հակասող դրույթներ, քանի որ մրցույթի հայտարարության մեջ նշվում է վարձակալությամբ հատկացվող տարածքներում թույլատրելի որսի մասին, մինչդեռ Գնիշիկ բնակավայրի տարածքում որսն արգելված է. այն ներառված չէ Վայոց ձորի մարզի որսահանդակների սխեմատիկ քարտեզում: Ըստ համայնքապետի, այն տարածքներում, որտեղ որ օրենքով սահմանված կարգով կարելի է որս անել, արոտ, բույսեր կան, որ ժողովուրդը քաղում է և օգտագործում է, բնականաբար, չպիտի խոչընդոտվեն։
Արենի համայնքապետը զրույցի վերջում նշեց, որ «Վայրի բնության ու մշակութային արժեքների պահպանման հիմնադրամի (FPWC) թիմին ի պատասխան լինելու է Բաց նամակ։
