Վարչապետ Նիկոլ Փաշինյանն այսօր հայտարարել է, որ 2022-ի հունվարի 1-ից էապես ավելանում են գիտաշխատողների աշխատավարձերը: Մասնավորապես, տեղի կունենան աշխատավարձերի հետևյալ բարձրացումները.
Լաբորանտ՝ 67 հազարից՝ 102 հազար դրամ, աճը՝ 52 տոկոս:
Ավագ լաբորանտ՝ 76 հազարից՝ 110 հազար դրամ, աճը՝ 44 տոկոս:
Կրտսեր գիտաշխատող՝ 85 հազար 800-ից 120 հազար դրամ, աճը՝ 40 տոկոս:
Ավագ գիտաշխատող՝ 99 հազարից 200 հազար դրամ, աճը՝ 102 տոկոս:
Առաջատար գիտաշխատող՝ 114 հազար 300-ից 250 հազար դրամ, աճը՝ 118 տոկոս:
Գլխավոր գիտաշխատող՝ 138 հազար 100-ից 367 հազար 100 դրամ, աճը՝ 165 տոկոս:
Գիտական խմբի ղեկավար՝ 129 հազար 100-ից 230 հազար դրամ, աճը՝ 78 տոկոս:
Գիտական ստորաբաժանման ղեկավար՝ 141 հազար 400-ից 350 հազար դրամ, աճը՝ 147 տոկոս:
Այս առնչությամբ Գիտությունների ազգային ակադեիմիայի նախկին նախագահ Ռադիկ Մարտիրոսյանը «Առաջին լրատվական»-ի հետ զրույցում նշեց, որ շատ բարձր է գնահատում այս քայլը. «Երկար տարիներ գիտաշխատողները շատ ցածր են վարձատրվել: Բացի այդ, ընդհանրապես, գիտությանը հատկացվող միջոցները քիչ են եղել, ընդամենը բյուջեի 0,25 տոկոսը: Անընդհատ այդ մասին խոսել ենք և վերջապես տեղից շարժվել է հարցը: Առաջին հերթին կառավարությունը որոշել է աշխատավարձները բարձրացնել: Սա կարևոր որոշում է, գիտության ոլորտի աշխատողները սա գնահատում են»,-ասաց նա:
Հարցին, թե որաքանո՞վ սա կնպաստի գիտության զարգացմանը, որքանով կմեծանա մոտիվացիան գիտությամբ զբաղվելու, Մարտիրոսյանը պատասխանեց. «Դժվարանում եմ ասել: Առաջին հերթին դա կնպաստի, որ մեր գիտաշխատողների արտագաղթը քչանա: Դա կնպաստի, որ երիտասարդները գան գիտություն, որովհետև մենք այսօր պրոբլեմ ունենք երիտասարդ գիտնականների: Մանավանդ գիտության ասպարեզում մենք ունենք գիտաշխատողների թվի նվազեցում: Դա կնպաստի մեր միջազգային համագործակցությանը, կնպաստի նրան, որ այդ միջոցների մի մասը կտրամադրվեն գիտական հետազոտությունների հենքի արդիականացմանը: Շատ խնդիրներ կլուծվեն: Սա պահանջված քայլ էր շատ վաղուց: Անընդհատ շեշտել ենք դա և վերջապես էական փոփոխություն է կատարվում»:
