Նոյեմբերի 26-ին վերաքննիչ քրեական դատարանը մերժեց դատախազության՝ սահմանադրական կարգի ենթադրյալ տապալման գործով ՍԴ դիմելու և սույն քրեական գործով վարույթը կասեցնելու միջնորդությունը՝ անփոփոխ թողնելով Երևանի քաղաքի առաջին ատյանի ընդհանուր իրավասության դատարանի որոշումը։ Դատարանը մերժեց նաև Ռոբերտ Քոչարյանի պաշտպանների և տուժող կողմի ներկայացուցիչների միջնորդությունները։
Հիշեցնենք, որ Երևան քաղաքի ընդհանուր իրավասության դատարանը՝ նախագահությամբ դատավոր Աննա Դանիբեկյանի, ապրիլի 6-ին, հիմք ընդունելով ՍԴ՝ ՔՕ 300.1 հոդվածը հակասահմանադրական ճանաչելու որոշումը, արդարացրել է ՀՀ երկրորդ նախագահ Ռոբերտ Քոչարյանին, նախկին փոխվարչապետ Արմեն Գևորգյանին, պաշտպանության նախկին նախարար Սեյրան Օհանյանին և ԶՈՒ ԳՇ նախկին պետ Յուրի Խաչատուրովին՝ դադարեցնելով նրանց նկատմամբ սույն հոդվածով քրեական հետապնդումը՝ հանցագործության դեպքի բացակայության հիմքով։
Փաստաբան, Մարտի 1-ի գործով Փաստահավաք խմբի անդամ Սեդա Սաֆարյանը «Առաջին լրատվական»-ի հետ զրույցում նշեց, որ նման որոշումն իր համար բոլորովին անակնկալ չէր. «Ես կարծում եմ, որ անգամ բողոքարկելու ժամանակ մենք դա պետք է նկատի ունենայինք և երևի առաջին ատյանի դատարանից միանգամից դիմեինք համապատասխան միջազգային կառույցներին: Բայց էլի պահպանվել էր մեր հավատը որոշ մարդկանց նկատմամբ: Ես մտածել եմ, որ ամեն դեպքում դատարանի երեք հոգանոց կազմից գոնե 1-2-ը կարող են տարբեր մտածել, բայց կրկին խաբվել են տուժողները: Այն ժամանակ անիմաստ բողոքարկում է եղել, որովհետև ես անգամ այն կարծիքին եմ, որ ինչպես 2008-ին բոլորն իմացել են՝ ինչ են անելու, հիմա էլ ՍԴ-ն, վճռաբեկ դատարանը, առաջին ատյանի դատարանը, բոլորն էլ իմացել են, որ այդ գործին այդ ընթացքով պետք է լուծում տան, այսպիսի որոշում պետք է կայացնեն, և նախկինում իրենց հովանավորած անձին հիմա էլ կշարունակեն հովանավորել»,-ասաց նա:
Սեդա Սաֆարյանը նկատեց, որ այստեղ իրավունքի ոչ մի խնդիր չկա, որովհետև որևէ երկրում չի կարող մեղադրական եզրակացության մեջ այդքան բազմադրվագ հանցագործությունների մասին խոսք լինել, և վերջում որոշեն, որ քրեական հետապնդումը դադարեցվում է:
«Դատախազությունը դեռ շարունակում է պնդել, որ ինքը կողմ է, որ քրեական օրենսգրքի 300.1 հոդվածով հանցակազմը որևէ խոցելի մաս չի ունեցել: Բայց ես կարծում եմ, որ մեղադրանքի հիմքում ոչ միայն 300.1-ը պետք է դրվեր, այլ նաև 223 հոդվածի հետ համակցմամբ պետք է դրվեր, որովհետև բոլոր հանցավոր դրսևորումները, ի սկզբանե, խոսում են այն մասին, որ վերևից մինչև ներքև կազմավորված հանցավոր կայուն խմբավորում է եղել և այդ խմբավորումը իր առջև դրված խնդիրը լուծել է՝ լինի սահմանադրական կարգը տապալելուն ուղղված գործողություն, թե ինչ գործողություններ:
Ամեն դեպքում, այն, ինչ վերաքննիչ դատարանն արել է, տուժողների համար սպասելի էր, պատահական չէ, որ մենք գտնում ենք, որ այո, ՀՀ-ում կան գործեր, որոնք չափանիշն են Հայաստանի արդարադատությունը չափելու: Դա ցույց տվեց, որ Հայաստանը պատրաստ չէ մեծամասշտաբ գործ քննելու, Հայաստանում օրենքի առջև բոլորի հավասարության սկզբունքը չի գործում, ինչպես մինչև հիմա չի գործել: Մենք հասկացանք, որ տուժողները պաշտպանության արդյունավետ միջոց չունեն ու մենք հիմա այլևս սպասելու ոչ մի ժամանակ չունենք»,-ընդգծեց Սաֆարյանը:
Նա հայտարարեց, որ իրենց հաջորդ քայլը ՄԻԵԴ դիմելն է. «Այդ գործերը շատ արագացված կգնան, որովհետև այդ գործերի վրա աշխատել ենք, դրանք ավարտական փուլում են: Կարծում եմ՝ առաջիկա մի քանի օրվա մեջ անգամ առաջին գործերը կգնան:
Տուժողների իրավահաջորդները նույնպես գիտեին, որ Հայաստանում պատրաստ չեն Ռոբերտ Քոչարյանի և մյուսների հանցավոր արարքները, որոնք տեղ են գտել մեղադրական եզրակացության մեջ, որոնք իրենց ծավալով շատ մեծ են, և որոնք ակնառու խոսում են արարքի հանցավորությունների մասին, արժանացան դատական համակարգի պաշտպանությանը»,-ասաց նա:
Լուսանկարը՝ Photolure-ի
