Իսրայելական The Jerusalem Post-ում հրապարակվել է Բեն Հարթմանի հոդվածը, որտեղ վերջինս համեմատում է հայկական սփյուռքի Birthright Armenia ծրագիրը հրեական աշխարհի Birthright Israel («Տագլիտ») ծրագրի հետ:
Բեն Հարթմանը, մասնավորապես, գրում է, որ դժվար չէ շատ հետաքրքիր համեմատություն անել հայերի և հրեաների միջև: «Ամբողջ աշխարհում սփռված, ցեղասպանության ու ողբերգության հետևանքով տեղահանված փոքր, հին ժողովուրդ` հաջողակ գլոբալ սփյուռքով, որը հավատարիմ է պատմական հայրենիքին»,-այսպես է արտահայտվել Հարթմանը հայերի մասին:
2003-ից գործող հայկական սփյուռքի Birthright Armenia ծրագիրը երկուսից մինչև 12 ամսով հայրենիք է բերում 20-32 տարեկան երիտասարդների, որոնք առնվազն մեկ հայ տատ կամ պապ ունեն: Ծրագիրը կոչված է խորացնել հայրենակիցների կապը հայրենիքի հետ և պայմաններ ստեղծել ավելի երկարատև ու գործնական ուղևորության համար: Ծրագրից արդեն օգտվել են ավելի քան 500 հայ երիտասարդներ՝ 25 երկրներից:
Հայաստանում ծրագրի տնօրեն Սևան Կաբակյանն ասում է, որ մասնակիցները մինչև մեկ տարի են ծախսում` կամավոր աշխատելով շաբաթական 30 ժամ: Նրանք մասնակցում են երկրի կյանքին, ապրում են շարքային հայաստանցու պես:
Հոդվածում հեղինակը նշում է, որ Birthright Armenia-ն Birthright Israel-ի նման ներառում է այցելություններ, մշակութային և պատմական հուշարձաններ, հանդիպումներ տեղի հայ երիտասարդների հետ:
Ծրագրի հիմնադիր Էդել Հովնանյանն ասում է, որ երբ 2003-ին սկսվել է նախաձեռնությունը, ինքը կապվել է Birthright Israel-ի հետ և անվան օգտագործման թույլտվություն խնդրել: Հավանություն ստանալուց հետո նա նաև հանդիպել է իսրայելական ծրագրի մի քանի ներկայացուցիչների հետ, որոնք բացատրել են ծրագրի հիմքում դրված գաղափարները և սկզբունքները:
