Ադրբեջանական Trend լրատվական գործակալության փոխանցմամբ՝ թեև 2012 թ. Վրաստանում տեղի ունենալիք խորհրդարանական ընտրությունների կոնկրետ ժամկետը դեռ հայտնի չէ՝ մի շարք ընդդիմադիր կուսակցություններ արդեն հայտարարել են, որ սեպտեմբերին սկսվելու է իրենց նախընտրական ակտիվ քարոզարշավը։
Բնակչության հետ արդեն սկսել է ակտիվորեն հանդիպել «Ազատ դեմոկրատներ»-ի առաջնորդ Իրակլի Ալասանիան, ով միաժամանակ հանդիսանում է, այսպես կոչված` ընդդիմադիր վեցնյակի առաջնորդը։ Այդ քաղաքական կոալիցիայում ընդգրկված են նաև «Հանրապետական», «Ազգային ֆորում», «Ժողովրդի», «Պահպանողական» և «Վրաստանի ուղի» կուսակցությունները։
Հիշեցնենք, որ 2008 թվականի մայիսին տեղի ունեցած խորհրդարանական ընտրություններում հաղթել է Վրաստանի ներկայիս նախագահ Միխեիլ Սաակաշվիլիի կողմից 2001 թվականի հոկտեմբերին հիմնադրված «Միացյալ ազգային շարժում» կուսակցությունը՝ հավաքելով քվեների 63 տոկոսը և ստանալով 150 խորհրդարանական մանդատներից 119-ը։