«Առաջին լրատվականի» զրուցակիցն է ԼՂՀ նախագահի մամուլի խոսնակ Դավիթ Բաբայանը:
– Պարոն Բաբայան, նախօրեին կայացավ Մեդվեդև-Ալիև հանդիպումը, և կան կարծիքներ, որ այսուհետ լինելու են երկկողմ հանդիպումներ և եռակողմ հանդիպումներ չեն լինի՝ մինչև Ռուսաստանը կողմերի հետ առանձին-առանձին չճշտի իրենց դիրքորորշումները: Դուք ինչպե՞ս եք գնահատում այդ կարծիքները, և երկկողմ հանդիպումն, ըստ Ձեզ, ի՞նչ էր նշանակում:
– Ես չեմ կարծում, որ Ռուսաստանը փոխելու է եռակողմ հանդիպումների ձևաչափը, ուղղակի Մեդվեդև-Ալիև հանդիպումն ուրիշ հարթության մեջ պետք է տեսնել, ինչպես նաև պետք է դիտել Մեդվեդևի նախօրոք արված մի հայտարարության ներքո, երբ նա ասաց, որ նույնիսկ անվերջ բանակցություններն ավելի գերադասելի են, քան պատերազմական գործողությունների վերսկսումը: Հետևաբար՝ Մեդվեդևն Ալիևին կանչել է հատուկ, որպեսզի և՛ Ռուսաստանի պաշտոնական դիրքորորշումը ներկայացնի, և՛ միջնորդ երկրների, որ պատերազմական գործողություններն անթույլատրելի են, և Ադրբեջանի կողմից վարվող ապակառուցողական քաղաքականությունն անընդունելի է՝ ինչպես Ռուսաստանի, այնպես էլ միջազգային հանրության համար: Իմ կարծիքով՝ այդ հանդիպման ամենամեծ շեշտադրումը հենց դա է եղել:
– Մեդվեդևի նույն այդ հայտարարության մեջ ասվում է, որ այն, ինչ 2008թ. տեղի ունեցավ Աբխազիայում և Հարավային Օսիայում պետք է «մեծ դաս» լինի Ադրբեջանի և Հայաստանի համար: Ձեր գնահատմամբ ի՞նչ էր ուզում սրանով ասել Մեդվեդևը, և ո՞ւմ էր ուղղված այս հայտարարությունը:
– Սա և դիվանագիտական, և քաղաքական հայտարարություն էր և առաջին հերթին ուղղված էր Ադրբեջանին, որովհետև Ադրբեջանն է խոսում պատերազմական գործողությունների վերսկսման մասին, բայց Ռուսաստանի նախագահը, դիվանագիտական քայլ կատարելով, թողել է հետդարձի ճանապարհ և միայն Ադրբեջանին չի մեղադրում, այլ Հայաստանի անունն էլ է նշում, որպեսզի Ադրբեջանի համար հնարավորություն ստեղծի նորից փրկվելու համար: Սա է խնդիրը, բայց ես որևէ կասկած չունեմ, որ այդ հայտարարությունն ուղղված է հենց Ադրբեջանին, որովհետև հենց այդ պետությունն է իր նախագահի, իր բարձրագույն իշխանության շուրթերով խոսում պատերազմական գործողությունների վերսկսման մասին, այն, ինչ արեց Վրաստանը 2008թ.:
– Իսկ Մեդվեդև-Սարգսյան հանդիպման կայացման հավանականությունը մե՞ծ է:
– Մեծապես տարբերություն չկա, թե այդ հանդիպումը կլինի, թե՝ ոչ: Ինձ թվում է, որ կարևոր մեսիջը, որը Ռուսաստանը պետք է ասեր այս գործընթացում արդեն ասել է հենց Իլհամ Ալիևին, քանզի նա է աքլորացած ձևով փորձում ինչ-որ քայլեր կատարել: Այժմ առավել հավանական է եռակողմ հանդիպումը: Այս պահի դրությամբ ամենամեծ ասելիքը, որ միջազգային հանրությունը պետք է ասի վերաբերում է Ալիևին, որ վերջինս մտնի կառուցողական հունի մեջ, իսկ Հայաստանին տեղը դնելու կարիք այս պահին չկա, Ադրբեջանին պետք էր տեղը դնել, և Մեդվեդևը ինչ-որ կերպ այդ գաղափարը փոխանցեց Ալիևին:
– Պարոն Բաբայան, շաբաթներ առաջ Մեդվեդևի հղած ուղերձը Սարգսյանին և Ալիևին արդեն ստացել է իր պատասխանը, և փորձագիտական շրջանակների կարծիքով հայկական կողմը բացասական է պատասխանել Մեդվեդևի ուղերձին: Ձեր գնահատմամբ, ինչպիսի՞ն եղած կլինի Հայաստանի պատասխանը:
