ԱՄՆ-ը կարող է խստացնել պատժամիջոցները Ռուսաստանի պարտքային արժեթղթերի նկատմամբ: Հայտնում է Bloomberg-ը՝ հղում անելով աղբյուրներին:
Գործակալության զրուցակիցների խոսքով՝ Սպիտակ տունն ուսումնասիրում է Ռուսաստանի դեմ կիրառված պատժամիջոցների հետևանքները, որոնք մտցվել են ապրիլի 15-ին: Նրանք ասացին, որ ԱՄՆ նախագահ Ջո Բայդենի վարչակազմը մտադիր է խստացնել դրանք, եթե Ռուսաստանի իշխանությունները «չդադարեցնեն հաքերային հարձակումները և ԱՄՆ քաղաքականությանը միջամտելու փորձերը»:
Ըստ աղբյուրների՝ հնարավոր միջոցներից է ամերիկյան ընկերությունների կողմից ռուսական պարտքային արժեթղթեր գնելու արգելքը ոչ միայն առաջնային, այլ նաև երկրորդային շուկայում:
Ապրիլի 15-ին ԱՄՆ նախագահ Ջո Բայդենը հրամանագիր է ստորագրել Ռուսաստանի դեմ պատժամիջոցներ կիրառելու մասին: Պատժամիջոցները կիրառվել են 16 կազմակերպությունների և 16 ֆիզիկական անձանց նկատմամբ, որոնք ենթադրաբար կապված են Ռուսաստանի Դաշնության կողմից ամերիկյան ընտրություններին միջամտելու հետ: ԱՄՆ-ը արտաքսում է նաև 10 ռուս դիվանագետների: Բացի այդ, ԱՄՆ գանձապետարանն արգելել է ընկերություններին Ռուսաստանի պետպարտքը գնել ՌԴ Կենտրոնական բանկից, Գանձապետարանից և Ազգային հարստության հիմնադրամից։
Դրանից հետո Ռուսաստանի արտգործնախարարությունը կանչեց երկրում ԱՄՆ դեսպան Ջոն Սալիվանին և հայտնեց, որ Մոսկվան առաջիկայում պատասխան միջոցների շարք կներկայացնի Վաշինգտոնի սահմանած պատժամիջոցների դեմ:
