ԱՄՆ-ի իշխանությունները 70 տարվա ընթացքում առաջին անգամ ի կատար են ածել կնոջ նկատմամբ մահապատիժը: Այդ մասին հաղորդել է New York Times թերթը: Դատապարտյալ Լիզա Մոնթհոմերին մեղավոր է ճանաչվել 2004 թվականին հղի կնոջ հատկապես դաժան սպանության գործով:
Ավելի վաղ պլանավորվել էր, որ դատավճիռն ի կատար կածվի դեկտեմբերի 8-ին Ինդիանայի նահանգում: Հետագայում, դատարանի որոշմամբ, մահապատիժը հետաձգել են մինչեւ հունվարի 12-ը: Ինդիանայի դատարանը հունվարի 11-ին դաշնային մակարդակով հետաձգել է Մոնթհոմերիի մահապատժի ի կատար ածումը նրա հոգեվիճակի հետ կապված խնդրի պատճառով:
Սակայն ԱՄՆ-ի Գերագույն դատարանն այդ որոշումը մերժել է հունվարի 12-ի երեկոյան՝ թույլ տալով իրականացնել մահապատիժը: Ինչպես հաղորդում է հրատարակությունը, Մոնթհոմերիի մահապատիժն իրագործվել է մահացու ներարկման օգնությամբ՝ Ինդիանայի նահանգի Թերե-Հոթ բանտում:
Կնոջ մահն արձանագրել են հունվարի 13-ին տեղական ժամանակով 01:31-ին (Երեւանի ժամանակով 10:31-ին): Մոնթհոմերիի դատապաշտպան Քելլի Հենրին հայտարարել է, որ ԱՄՆ-ի իշխանությունները խախտել են օրենքը՝ մահապատժի ենթարկելով իր սպասարկյալին, որը տառապում էր «հոգեկան հիվանդությամբ»: Հուլիսին ԱՄՆ-ի Գերագույն դատարանը որոշում Է ընդունել, որ 17 տարվա ընթացքում առաջին մահապատիժներն ԱՄՆ-ի դաշնային բանտերում կարող են իրականացվել, չեղարկելով կասեցումը, որն ավելի վաղ կարգադրվել էր ստորին ատյանի դատարանի կողմից: Առաջինը մահապատժի է ենթարկվել 47-ամյա Դենիել Լյուիս Լին, որը նույնպես պահվում Էր Ինդիանայի նահանգի Թերե-Հոթ բանտում: Լիզա Մոնթհոմերի մահապատիժը թվով տասնմեկերորդն է, հաղորդել է ՌԻԱ Նովոստին:
