Նիկոլ Փաշինյանը օրերս հանդես եկավ ծավալուն հոդվածով «44-օրյա պատերազմի ծագումը»: Այն տարաբնույթ մեկնաբանությունների արժանացավ: Թեմայի շուրջ «Առաջին լրատվական»-ը զրուցել է պատմաբան, հրապարակախոս Հայկ Դեմոյանի հետ:
«Կարդալով Փաշինյանի հոդվածը՝ եզրակացություններս երեք կետի հանգեցին: Լայնամասշտաբ, երկրի անվտանգությունը ցնցող պատերազմի մասին անդրադարձ կատարելիս երեք կարևոր հարց պետք է տալ՝ պատրաստվում էր արդյոք երկիրը պատերազմին, որի մասին կար ստույգ տեղեկություն: Կա փաստ, որ երկրի ղեկավարությունը զինվորական վերնախավի կողմից տեղեկացվել էր մոտալուտ պատերազմի մասին: Ձեռնարկվե՞լ են արդյոք ՀՀ-ում մինչպատերազմական իրավիճակին համապատասխան քայլեր. իհարկե՝ ոչ… Տեղի էին ունենում այնպիսի օրակարգով իրադարձություններ, որոնք ուղղված էին հասարակությանը շեղելու կարևոր հրամայականից՝ այն է՝ նախապատրաստվել պատերազմին: Պատերազմին պետք է պատրաստ լինի ոչ միայն բանակը, այլ նաև հասարակությունը»,- նշեց Դեմոյանը՝ ընդգծելով, որ երկիրը միտումնավոր կերպով չի նախապատրաստվել պատերազմի:
Նրա դիտարկմամբ՝ բուն պատերազմական գործողությունների ընթացքում այնպիսի տեղեկատվական քաղաքականություն էր վարվում, որը պատերազմի հրամայականներին ճիշտ հակառակ էր: «Օնլայն ռեժիմով իր հույզերն արտահայտելով՝ գերագույն գլխավոր հրամանատարը թշնամուն տալիս էր ամենակարևոր ինֆորմացիան… Ուղերձներ էին հնչում, որոնք ռազմական գաղտնիք էին պարունակում»: Պատմաբանը նաև ընդգծեց, որ Միացյալ տեղեկատվական կենտրոնը հասարակությանն ապատեղեկացնելու գիծ էր վերցրել, ինչն էլ հասարակությանը շոկային վիճակի մեջ գցեց:
Քանի դեռ զինադադարը չի կնքվել, պատերազմը դեռ շարունակվում է: Այս պատերազմը ցույց տվեց, որ տարիեր շարունակ մեզ չեն պատրաստել ոչ պատերազմի և ոչ էլ խաղաղության, մեզ պատրաստել են ստատուս քվոյի: Իսկ հիմա այս պարտությունից հետո մենք որպես հանրություն որքանով ենք պատրաստ նոր հնարավոր տարածաշրջանային զարգացումների որոնց մասին մեզ պարբերաբար զգուշացնում են: Անդրադառնալով այս դիտարկմանը՝ Հայկ Դեմոյանը նշեց, որ ցանկացած իշխանություն պետք է պատրաստ լինի հետպատերազմական իրավիճակի՝ անկախ նրանից կհաղթի, թե կպարտվի, սակայն այսօր նկատելի է, որ մեր իշխանությունը պատրաստ չէ և չունի ճգնաժամային իրավիճակում կառավարում իրականացնելու կարողություն:
«Հանրության հետ հաղորդակցություն չկա, իշխանություն-հասարակություն կապը խզված է: Եվ այսօր պատերազմում պարտվածի շապիկ հագած իշխանությունը չի կարող գնալ բանակցությունների»,- ընդգծեց Դեմոյանը:
Մանրամասն տեսանյութում:
