Ինչ է խոստանում ՀՀ արտգործնախարարի և ԱՄՆ պետքարտուղարի վաշինգտոնյան հադիպումը: «Առաջին լրատվական»-ի հետ զրույցում անդրադառնալով այս հարցին, «Հանուն հանրապետության» ԺՊԴԿ ղեկավար մարմնի անդամ Վահագն Մարտիրոսյանը հույս հայտնեց, որ այդ հանդիպման արդյունքում ամերիկյան կողմը կսկսի ինչ-որ քայլեր ձեռնարկել: «Մինչև հիմա ԱՄՆ-ի կրավորական պահվածքը ղարաբաղյան հակամարտության հարցում լրացուցիչ թևեր է տալիս թե՛ Ադրբեջանին, թե՛ Թուրքիային: Թե ինչ փոփոխություն կլինի, այդ մասին գուցե հնարավոր կլինի խոսել Պոմպեոյի հայտարարությունից հետո, մինչ այժմ զուտ ստանդարտ հայտարարություններ են արվել: Այս հակամարտությունը մարելու կամ գոնե և հրադարարի պահպանման ուղղությամբ չենք տեսել ԱՄՆ-ի, ինչպես նաև Իրանի կոնկրետ գործուն քայլերը: Կարծում եմ՝ այս հարցում միակ դերակատարները Ռուսաստանը և Թուրքիան են: Թուրքիան արդեն թաթերը խցկել է Հարավային Կովկաս, մեր դիվանագիտությունն ամեն ինչ պետք է անի այդ թաթերը կտրելու համար: Մեր թե՛ դիվանագիտության , և թե՛ առավել ևս ռազմական պարտությունը նաև ՌԴ պարտությունն է լինելու Հարավային Կովկասում»,- ասաց Մարտիրոսյանը:
«Քաղաքացու որոշում» կուսակցության գործադիր մարմնի անդամ Հայկ Սահակյանի կարծիքով՝ վաշինգտոնյան այդ հանդիպումից շատ բան պետք չէ սպասել: «Մեր տարածաշրջանը Ռուսաստանի ազդեցության գոտին է, և ըստ էության՝ Ռուսաստանը պետք է իր որոշիչ խոսքն ասի: ԱՄՆ-ը կարևոր մեսիջ ուղարկեց այն մասին, որ Թուրքիան մնալու է ՆԱՏՕ-ի կազմում, բայց այս պատերազմը ՆԱՏՕ-ի դեմ չէ, և եթե Թուրքիան և Ռուսաստանը բախման մեջ մտնեն, ԱՄՆ-ը չի կանգնելու Թուրքիայի կողքին: Սա մեզ համար կարևոր է: Կարծում եմ՝ ԱՄՆ-ը պրոհայկական դիրքորոշում կհայտնի և ճնշումներ կգործադրի Թուրքիայի վրա»,-նշեց Սահակյանը:
Նա նաև կարծիք հայտնեց, որ Ռուսաստանը կա՛մ պատրաստ չէ, կա՛մ ցանկություն չունի Թուրքիայի հետ ուղիղ բախման մեջ մտնել:
Վահագն Մարտիրոսյանը հավելեց, որ երեկ իր խոսքում Պուտինը կարևոր ուղերձ հղեց Հայաստանին՝ ասելով, որ Թուրքիան իր համար կարևոր գործընկեր է, և Հայաստանի համար չի պատրաստվում ուղիղ բախման մեջ մտնել Թուրքիայի հետ»:
Մանրամասն՝ տեսանյութում:
