Թաիլանդի իշխանությունները հայտարարել են Բանգկոկում արտակարգ դրության ռեժիմ սահմանելու մասին՝ վերջին օրերին մայրաքաղաքում անցկացվող հակակառավարական բողոքների ֆոնին: Այդ մասին հաղորդել է Bangkok Post պարբերականը:
Պարբերականի հաղորդագրության համաձայն, Բանգկոկում արտակարգ դրությունն ուժի մեջ է մտել հոկտեմբերի 15-ին, բողոքի մասնակիցները հանրահավաքի վայրը լքում են Կառավարության տան մոտ:
Reuters գործակալությունը, վկայակոչելով պաշտոնական փաստաթուղթը, հաղորդում է, որ իշխանությունները նաեւ արգելել են հինգից ավելի մարդկանցից բաղկացած խմբերով հավաքվել, ինչպես նաեւ հաղորդագրություններ ու նորություններ հրապարակել, որոնք կարող են «վախ առաջացնել եւ վնաս հասցնել ազգային անվտանգությանը»:
Բացի այդ, գործակալությունը, վկայակոչելով իրավապաշտպաններին, հաղորդել է երկու մարդու ձերբակալման մասին, որոնց համարում Է հակակառավարական բողոքների առաջնորդներ: Ավելի վաղ ՌԻԱ Նովոստիի թղթակիցը իրադարձությունների վայրից հաղորդել է, որ Բանգկոկում հակակառավարական բողոքների մասնակիցները, որոնք անհապաղ պահանջում են վարչապետ գեներալ Պրայուտ Չան-Օչի հրաժարականը, հաղթահարել են ծայրահեղ միապետականների եւ վարչապետի կողմնակիցների դիմադրությունը, պայմանավորվել ոստիկանության հետ եւ ճեղքել անցել մինչեւ Կառավարության տան համալիրի տարածքի պարիսպը:
Բողոքը նվիրված էր «Ուսանողական հեղափոխության» տարեդարձին, որը 1973 թվականի հոկտեմբերի 14-ին տապալել է ծայրահեղ հակակոմունիստական ռազմական դիկտատոր ֆելդմարշալ Տհանոմ Կիտիկաչոնին:
