Ինչպես մեր հերոս տղաներն են առաջնագծում իրենց պարտքը տալիս հայրենիքի առաջ, նույն ընկալումը կա նաև տնտեսական գործունեություն իրականացնող մարդկանց մոտ: Հարկային ու վարկային պարտավորությունները պատշաճ կատարելը իրենց մոտ ընկալվում է որպես պարտք հայրենիքի առաջ, ոչ թե զուտ պետության առջև պարտավորություն: Ես այս իմաստով խնդիր չեմ տեսնում: Այս մասին «Առաջին լրատվական»-ի հետ զրույցում ասաց ՀՊՏՀ վիճակագրության ամբիոնի վարիչ, տնտեսական գիտությունների թեկնածու, դոցենտ Արմեն Քթոյանը՝ պատասխանելով այն հարցին, թե ինչպես պետք է տնտեսվարողները դրսևորեն իրենց պատերազմական այս իրավիճակում:
«Ես վստահ եմ` շատերը կցանկանային զենքը ձեռքին գնալ ու մարտնչել առաջնագծում, բայց դրա նպատակահարմարությունը հիմա չկա: Դրանից ելնելով, տնտեսվարողները իրենց անմիջական ոլորտում փորձում են կրկնակի ու եռակի անգամ ավելի ջանքեր գործադրել: Այս համախմբումը, արժեքային ընդհանրությունները՝ պետություն, բանակ, հայրենակից, այս ամենը վերաիմաստավորած մենք պետք է առաջ գնանք»,- վստահ է տնտեսագետը:
Քթոյանի խոսքերով՝ պատերազմի հաղթական ավարտից հետո մենք շատ բան ունենք շարունակելու, շատ անելիքներ ունենք: «Այս ընկալումը եթե մենք կարողանանք որպես արժեքային համակարգ առաջ տանենք, կկարողանանք ստեղծել հզոր պետություն, հզոր տնտեսություն, որը տարածաշրջանում լուրջ գործոն կարող է լինել ու ստիպել հաշվի նստել իր հետ»,- շեշտեց Քթոյանը:
Նրա կարծիքով՝ պետք է վերաիմաստավորել բնական գիտությունների զարգացման տեսլականը, դրան ավելացնելով ռազմական գիտության բաղադրիչը: «Մենք վերջին տարիներին հումանիտար գիտությունների նկատմամբ ունենք առաջընթաց: Հիմա պատերազմը մեզ ստիպում է վերանայել այս ամենը: Տնտեսության կարևորության ընկալումը ակնառու է բոլորի մոտ: Դրա համար է լայնորեն շրջանառվում, թե պատերազմի մեկ օրն ինչ արժեք ունի պետության համար: Այսինքն՝ մենք գիտակցում ենք, որ պատերազմը փող է: Հիմա շատ փորձագետներ տարածում են այն թեզը, որ վարում ենք 5-րդ սերնդի պատերազմը, նորագույն տեխնոլոգիաներով: Հասարակության շրջանում կոնսենսուս կա, որ մենք պետք է բանակը կառուցենք, տնտեսությունը զարգացնենք, հենց այս տիպի պատերազմ վարելու կարողությունները հզորացնելու նպատակով: Հասարակության մեջ էլ ակտիվացել են այն տեսակետները, որ պետք է նախկինում գողացված գումարները հետ վերադարձվեն բանակի համար, ու հասարակությունը պատրաստ է եթե ոչ իրավական՝ գոնե բարոյական մակարդակում ներում շնորհել այդ մարդկանց: Դա ևս ազդակ է, որ հանրությունը լուծումներ փնտրում է, որը գալիս հանգում է արդյունավետ տնտեսություն կառուցելու անհրաժեշտությանը»,- մանրամասնեց Արմեն Քթոյանը:
Մեր զրուցակցի խոսքերով՝ տնտեսության անկարևոր ճյուղ չկա, բոլոր ուղղություններով պետք է զարգացում ապահովել, որը ուղիղ կանդրադառնա բանակի հզորության ու մարտունակության վրա:
