Մայր Աթոռի տարածած հայտարարության մեջ նշվում է, որ Ադրբեջանը՝ անտեսելով միջազգային բոլոր պարտավորությունները, բացահայտում է Արցախի հայաթափմանը եւ հայկական մշակութային ներկայության ոչնչացմանը միտված իր քաղաքականությունը։
«Այսօր խաղաղ բնակավայրերի հերթական հրետակոծության ժամանակ նշանառության տակ է առնվել եւ ռմբակոծվել Շուշիի Սուրբ Ամենափրկիչ Ղազանչեցոց եկեղեցին։ Մայր Աթոռ Սուրբ Էջմիածինը, դատապարտելով կատարվածը եւ դիտարկելով այն որպես ծայրահեղ կրոնական անհանդուրժողականության դրսեւորում, կոչ է ուղղում Եկեղեցիների հովվապետերին, միջազգային հանրությանը եւ կազմակերպություններին, միջեկեղեցական ու միջկրոնական կառույցներին՝ վճռական ձայն բարձրացնելու հանուն արյունահեղության կասեցման, Արցախի ժողովրդի ազատ ու անկախ կյանքի իրավունքի պաշտպանության, հոգեւոր-մշակութային հնամենի ժառանգության եւ վկայությունների անխաթար պահպանման»,- նշված է հաղորդագրության մեջ։
