Անհոգ եղեք, մենք հաղթել ենք ու միշտ հաղթող ենք լինելու՝ Եռաբլուրում լրագրողների հետ ճեպազրույցում հայտարարել է Հայաստանի պաշտպանության նախարար Դավիթ Տոնոյանը, երբ լրագրողները հարցրել են օրերս Տավուշի ուղղությամբ ադրբեջանական նոր սադրանքին պատասխան տալու մասին: Դավիթ Տոնոյանը խորհրդարանում հայտարարել էր, որ Ադրբեջանը մտահոգ է, քանի որ գիտի՝ իրականացվելու են համապատասխան գործողություններ:
Ադրբեջանը վերջին օրերին ու շաբաթներին վարում է գերինտենսիվ քարոզչություն այն շեշտադրումով, թե հայկական կողմը պատրաստվում է պատերազմի, պատրաստվում է սադրանքի: Բաքվի այդ քարոզչությունը Հայաստանում ընկալվում է որպես պատերազմի նախապատրաստություն, որի համար պատասխանատվությունն Ադրբեջանը փորձում է դնել Հայաստանի վրա: Արդյոք այստե՞ղ է խնդիրը՝ իհարկե բավականին բարդ է ասել, քանի որ դրա համար պետք է մտնել Ալիևի թե՛ գլխի մեջ՝ հասկանալու համար, թե ինչ է կատարում այնտեղ, թե՛ նաև նրա դրության:
Բանն այն է, որ Ադրբեջանի նախագահը տապալվել է հիմնավորապես՝ իր քաղաքական փիլիսոփայության առումով:
Նա այլևս չունի ժամանակ և կա՛մ պետք է սկսի պատերազմ, կա՛մ պետք է տապալվի՝ ադրբեջանական հանրությանը չկարողանալով բացատրել, թե, ի վերջո, ինչու չի գնում հաղթելու, եթե այդքան վստահ է իր բանակի վրա: Պատերազմ սկսելու համար Ալիևը պետք է ունենա ոչ թե 100, այլ 500 կամ 1000 տոկոս համոզվածություն, որ այն ավարտելու է նախ՝ արագ, և հետո՝ հաղթանակով: Ալիևն այդպիսի համոզվածություն կարող է ունենալ միայն մի դեպքում՝ եթե ունի նույնքան երաշխիք, որ ուժային կենտրոնները, որոնք հետաքրքրված են ռեգիոնալ անվտանգությամբ, ոչ միայն չեն խանգարելու իրեն, այլ նաև նպաստելու են այդ հաղթանակին:
Այլ կերպ ասած՝ Ադրբեջանի համար չկա և տեսանելի ապագայում չի լինելու պատերազմ սկսելու անհրաժեշտ նախադրյալ: Հետևաբար Ալիևը կարող է գնալ այդ քայլին մի դեպքում՝ եթե նրան ստիպեն: Ըստ այդմ՝ եթե նրան ստիպեն գնալ ռազմական մեծ սադրանքի, ուրեմն անկասկած է, որ դա լինելու է այն փոսը, որում առաջինը հայտնվելու է Ալիևը, հետո իհարկե կարող է հայտնվել ամբողջ ռեգիոնը: Ահա թե ինչու է Ադրբեջանի նախագահի պաշտոնը զբաղեցնող Իլհամ Ալիևը ինտենսիվացրել քարոզը, թե Հայաստանը պատրաստվում է պատերազմի:
Ալիևն այդպիսով փորձում է կանխել պատերազմի պարտադրանքը, որ կարող է հայտնվել իր վրա, և որի առաջին զոհն էլ դառնալու է հենց ինքը: Ալիևը պատերազմի մասին ինտենսիվ քարոզչական աղմուկով փորձում է օգնություն հայցել ռազմական ճանապարհով իր հարցը լուծելու դեմ: