Պենտագոնը քննադատել է Ռուսաստանի զինվորականներին Սիրիայի արևելքում ամերիկյան և ռուսական զրահատեխնիկայի բախումից հետո «միտումնավոր սադրիչ և ագրեսիվ պահվածքի համար»: Այս մասին հաղորդել է CNN-ը:
«Ռուսական ուժերը խախտել են Սիրիայում հակամարտությունների կարգավորման վերաբերյալ մեր պայմանավորվածությունները և ԱՄՆ զինվորականներին վիրավորել են իրենց միտումնավոր սադրիչ և ագրեսիվ պահվածքով»,- ասել է Պենտագոնի գլխավոր մամուլի քարտուղար Ջոնաթան Հոֆմանը:
Երեքշաբթի օրը Սիրիայում ռուսները զրահավոր փոխադրիչ մեքենայով հետևել և հարվածել են ամերիկյան զրահապատ ավտոմեքենային: Տուժել է ԱՄՆ յոթ զինծառայող: Դեպքը տեղի է ունեցել երկրի հյուսիսարևելյան հատվածում`Դայրիկ բնակավայրի մոտակայքում, որտեղ սովորաբար ռուս պարեկներ չկան:
Դեպքի մասին տեսանյութը հայտնվել է սոցիալական ցանցերում: Ռուսները զրահամեքենաներով հետապնդել և արգելափակել են ԱՄՆ բանակի պարեկներին: Տեսանյութում երևում է նաև ցածր թռչող ուղղաթիռ, հավանաբար այն նույնպես ռուսական է:
Ռուսաստանի Դաշնության պաշտպանության նախարարությունն, իր հերթին, մեղադրել է ամերիկացի զինվորականներին պայմանավորվածությունները խախտելու և Սիրիայում Ռուսաստանի ռազմական ոստիկանության պարեկությանն արգելափակելու փորձի մեջ: ՌԴ պաշտպանության նախարարությունը հայտնել է, որ ի պատասխան Ռուսաստանի ռազմական ոստիկանությունը «ձեռնարկել է անհրաժեշտ միջոցներ՝ միջադեպը կանխելու և հետագայում հանձնարարված առաջադրանքը կատարելու համար»:
