Երևանի մամուլի ակումբի նախագահ Բորիս Նավասարդյանը, մեկնաբանելով Թուրքիայի կառավարության՝ երկրում լույս տեսնող հայկական, ինչպես նաև հունական և հրեական պարբերականներին աջակցություն տրամադրելու փաստը, «Առաջին լրատվական»-ի հետ զրույցում մասնավորապես ասաց, որ տվյալ պարագայում ազգային փոքրամասնություններին աջակցություն ցուցաբերելու՝ Թուրքիայի կառավարության որոշումը «բնականոն երևույթ է ցանկացած քաղաքակիրթ երկրի համար»:
Նրա խոսքով՝ Թուրքիայում լրատվամիջոցների վիճակն այնպիսին չէ, որ այդ օգնությունը չօգտագործվի որպես քաղաքական ազդեցության լծակ, և ցանկացած լրատվամիջոց ինքն է որոշում՝ընդունե՞լ, թե՞ չընդունել այդ օգնությունը: Նրա խոսքով՝շատ դեպքերում կառավարությունները համարում են, որ ընդդիմադիր լրատվամիջոցները գործում են առևտրային հիմունքներով, բացի այդ, կառավարությունից գումարներ ստանալը վերջիններիս համար նշանակում է կախվածության մեջ ընկնել իշխող վարչակարգից:
Այն հարցին, թե ինչպե՞ս է ստացվել, որ մեզանում իշխանությունները դատի են տալիս ընդդիմադիր թերթերին, իսկ Թուրքիան աջակցելու է ազգային փոքրամասնությունների լրատվամիջոցներին, Բ.Նավասարդյանը պատասխանեց, որ շատ քիչ երկրների կառավարություններ են աջակցում ընդդիմադիր լրատվամիջոցներին: Որպես օրինակ՝ նա բերեց Ավստրիան և Ֆինլանդիան: Ինչ վերաբերում է ընդդիմադիր թերթերին դատի տալու փաստերին, նա ասաց, որ քաղաքական վերնախավը պետք է պատրաստ լինի իր հասցեին ուղղված քննադատությանը: «Մեզանում հանդուրժողականությունը ցածր աստիճանի վրա է»,- նշեց Բ. Նավասարդյանը՝ ավելացնելով, թե այն փոփոխությունները, որոնք կատարվել են օրենսդրության մեջ, գործածվում են այն լրատվամիջոցների նկատմամբ, որոնք համարձակվում են քննադատական խոսք ուղղել «քաղաքական վերնախավի» հասցեին:
Նրա խոսքով՝ վիճակը կարող է հավասարակշռվել ու մեղմվել միայն հասարակական կարծիքի ազդեցությամբ՝ նպաստելով լրատվամիջոցների դեմ հարուցված դատական գործերի թվի պակասեցմանը:
«Եթե ճնշում լինի լրատվամիջոցների, միջազգային կառույցների, հանրության կողմից, ապա ճնշումը կհավասարակշռվի»,- հավելեց Երևանի մամուլի ակումբի նախագահը:
