«Ժամանակ» թերթը օրերս գրել էր, որ Երևանի քաղաքապետարանը անվավեր է ճանաչել վերելակների գնման մրցույթը, որում հաղթող էր ճանաչվել Սամվել Ալեքսանյանի հետ փոխկապակցված ընկերությունը, և որը պետք է վերելակներ ներկրեր Թուրքիայից: «Նոր հայտարարված մրցույթում հաղթող է ճանաչվել այլ ընկերություն, որն առաջարկել է նախորդից ավելի բարձր գին, սակայն վերելակները ներմուծվելու են Բելառուսից, որոնք անհամեմատ ավելի որակով են թուրքականից և ունեն շահագործման շատ մեծ ռեսուրս»,-գրել էր թերթը:
Երևանի քաղաքապետարանից, սակայն, հերքել են մեր հրապարակումը՝ նշելով, որ Երևանի քաղաքապետարանի կողմից՝ վերելակների ձեռքբերման նպատակով հայտարարված գնման ընթացակարգ երբևէ անվավեր չի ճանաչվել: Երևանի քաղաքապետարանը, օրենքով սահմանված կարգով, Երևանի բազմաբնակարան շենքերի թվով 500 հատ վերելակների ձեռքբերման (տեղադրումով և սպասարկմամբ) նպատակով 02.04.2020 թվականին հայտարարել է «ԵՔ-ԲՄԱՊՁԲ-20/15» ծածկագրով բաց մրցույթի ընթացակարգ, որի բացումը տեղի է ունեցել 13.05.2020 թվականին և որին մասնակցում են թվով հինգ կազմակերպություններ: Մասնակիցների կողմից ներկայացված հայտերը գտնվում են գնահատման փուլում: «Տեղեկացնում ենք, որ հայտարարված մրցույթներն անց են կացվում օրենսդրությանը համապատասխան, և նման հրապարակումը, ինչպես նաև այլ գործողություններ, չեն կարող ազդել գնման ընթացակարգի արդյունքների վրա»,-ասված է քաղաքապետարանի հերքման տեքստում։
