Խոսքի ազատության պաշտպանության կոմիտեի նախագահ Աշոտ Մելիքյանը այսօր լրագրողների հետ հանդիպմանը ներկայացրեց Հայաստանում խոսքի ազատության վիճակի և ԶԼՄ-ների իրավունքների խախտումների ԽԱՊԿ 2011 թվականի երկրորդ եռամսյակային զեկույցը: ԽԱՊԿ-ը, 2010 թվականից սկսած, ներկայացնում է Հայաստանում ԶԼՄ-ների գործունեության դաշտի և խոսքի ազատության վիճակի մասին եռամսյակային միջանկյալ զեկույցներ:
Ա. Մելիքյանը, խոսելով իրավական դաշտի փոփոխությունների մասին, անդրադարձավ հատկապես «Հեռուստատեսության և ռադիոյի մասին», «Գովազդի մասին» ՀՀ օրենքներում կատարված փոփոխություններին։ Դրա արդյունքում, ըստ նրա, վերացվեց այսպես կոչված ՙհովանոցային» թաքնված գովազդի արգելքը։ ՙԿանաչ լույս բացվեց օղու գովազդի համար, ինչը ցավալի է, տեսնենք թե դա ինչի կբերի»,- ասաց Մելիքյանը:
Ի տարբերություն 2011 թվականի առաջին եռամսյակի, երբ ֆիզիկական բռնություններ չեն գրանցվել, այս տարվա երկրոդ եռամսյակում եղել է բռնության երկու դեպք. մեկը Մարգարիտա Խաչատրյանի դեպքն է, մյուս աղմկահարույց դեպքը Արարատի մարզիչ Արկադի Անդրեասյանի հետ է կապված, երբ վերջինս բռնություն էր գործադրել ֆոտոլրագրող Աշոտ Առուշանյանի նկատմամբ։
«Առհասարակ, մեր հասարակության մեջ խոսքի քննադատության հանդուրժողականությունը շատ ցածր վիճակում է»,- նշեց Մելիքյանը: ԶԼՄ-ների և լրագրողների նկատմամբ ճնշումների 6 դեպք է գրանցվել, 2 դեպք էլ գրանցվել է տեղեկությունների տրամադրման խախտման հետ կապված։ Առաջին եռամսյակի համամեմատ, նվազել է լրագրողների նկատմամբ ճնշումների թիվը՝ 15-ից դառնալով 6: Վերջինս օրինակ բերեց «Իրավունք»-ի թղթակից Գայանե Զարգարյանի դեպքը: ԽԱՊԿ նախագահը խոսեց նաև վերջին շրջանում կրոնական կազմակերպությունների, օրինակ՝ Եհովայի վկաների ակտիվացման մասին։ Նրանք հայտ են ներկայացրել «Շանթ» և Հ1 հեռուստաընկերությունների դեմ: «Ազատ խոսքը, այլընտրանքային ինֆորմացիան պետք են հասարակությանը, պետք է սատարել լրագրողական կազմակերպություններին»,- եզրափակեց Ա. Մելիքյանը:
