ՌԴ նախագահ Վլադիմիր Պուտինը Մոսկվայի կենտրոնում՝ Մեծ Լյուբյանկայի հատվածում կրակոցների ժամանակ, որը տեղի է ունեցել դեկտեմբերի 19-ի երեկոյան, ԱԴԾ-ի տնօրեն Ալեքսանդր Բորտնիկովի հետ գտնվել է Կրեմլի համերգային դահլիճում: Այս մասին հաղորդել է պետության ղեկավարի մամուլի քարտուղար Դմիտրի Պեսկովը, գրում է ՏԱՍՍ-ը:
Պեսկովի խոսքերով, տեղի ունեցածը խելագարության դրսևորում է, որից ոչ մի երկիր ապահովագրված չէ:
Դեկտեմբերի 19-ի երեկոյան Մոսկվայի մարզի 39-ամյա բնակիչ Եվգենի Մանուրովը հարձակվել է ԱԴԾ-ի աշխատակիցների վրա՝ Լյուբյանկայում գտնվող գերատեսչության շենքի մոտ: Նա զինված է եղել Saiga կարբինով և իր մոտ զինամթերք է ունեցել: Կրակոցների արդյունքում սպանվել են ԱԴԾ-ի երկու աշխատակիցներ, հինգ մարդ վիրավորվել է, այդ թվում՝ մեկ քաղաքացիական անձ: Հարձակվողը գնդակահարվել է:
