Ինչպես հայտնում է Lifenews.ru կայքը, «Երևան Փլազա» առևտրի կենտրոնի տնօրենի սենյակում կատարված խուզարկության ժամանակ հայտնաբերվել են փաստաթղթեր, որոնք վկայում են ֆինանսական խոշոր խարդախության մասին: Նշվում է, որ Ռուսաստանի Անվտանգության դաշնային ծառայությունը զանգվածային խուզարկություններ է իրականացրել «Երևան Փլազայի» սեփականատիրոջ գրասենյակում: Խախտումները վերաբերում են «Երևան Փլազայի» կառուցմանը: Որոշ տեղեկություններով, այս կենտրոնը պատկանում է Սամվել Կարապետյանին՝ «Տաշիրի Սամոյին», որը նախագահ Սերժ Սարգսյանի աշխատակազմի ղեկավար Կարեն Կարապետյանի եղբայրն է:
Նշվում է նաև, որ իրավապահներին հաջողվել է բացահայտել մի շարք խարդախություններ: Պարզվել է, որ շինարարությունը «հովանավորել է» Մոսկվայի հարավային շրջանի նախկին ղեկավարը, որը հիմա գտնվում է բանտում, իսկ առևտրի կենտրոնի հաշվապահության միջոցով լվացվել են Մոսկվայի պաշտոնյաների գումարներ:
Պարզվել է նաև, որ «Երևան Փլազան կառուցվել է խոշոր խախտումներով, և վտանգ կա, որ այն ցանկացած պահի կարող է փլվել մետրոյի մեջ», քանի որ խախտվել են մետրոյի վրա կառուցելու նորմերը: Այս մասին կայքին ասել է ԱԴԾ ներկայացուցիչը: Աղբյուրը նաև նշել է, որ կենտրոնը մասամբ զբաղեցրել է քաղաքին պատկանող տարածք:
ԱԴԾ ներկայացուցչի փոխանցմամբ՝ խուզարկությունը տեղի է ունեցել առևտրի կենտրոնը կառավարող «Ստինկոմ-Գրուպ» ընկերության ղեկավար Գենադի Ստեփանյանի առանձնասենյակում: Հայտնաբերվել են փաստաթղթեր, որոնք հաստատել են նաև, որ Ստեփանյանը գումարներ է վճարել իրավապահ մարմինների ներկայացուցիչներին, որպեսզի նրանք հովանավորեն իրեն:
