«Էկոլոգիական միջանցքների ստեղծման աջակցություն» տարածաշրջանային ծրագիր

Բնության համաշխարհային հիմնադրամի (WWF) կողմից իրականացվող «Էկոլոգիական միջանցքների ստեղծման աջակցություն» տարածաշրջանային ծրագիրը մոտենում է իր ավարտին։ Այն տևել է 5 տարի, ֆինանսավորվել Գերմանիայի կառավարության կողմից՝ KfW Զարգացման բանկի միջոցով: Ծրագրի խնդիրն էր նպաստել կենսաբազմազանության պահպանությանը և հողերի կայուն օգտագործմանը՝ առանց նվազեցնելու տեղի գյուղական բնակչության եկամուտները:

Ծրագրի առաջին փուլն իրականացվել է  3 մարզերի 26 համայնքներում․

1․ Արարատ (Լանջանիստ, Լուսաշող, Շաղափ, Ուրցաձոր, Զանգակատուն համայնքներ),

2․ Վայոց ձոր (Արտավան, Բարձրունի, Գոմք, Խնձորուտ, Մարտիրոս, Նոր Ազնվաբերդ, Սերս համայնքներ),

3․ Սյունիք (Արևիս, Բռնակոթ, Մուցք, Սալվարդ, Շաղատ, Թանահատ, Թասիկ, համայնքներ)։

Տրամադրվել են փոքր դրամաշնորհներ, ինչի շնորհիվ բազմաթիվ համայնքներում լուծվել են սոցիալ-տնտեսական խնդիրներ, օրինակ՝ բարեկարգվել են ճանապարհներ, անցկացվել են ջրագծեր, ապահովվել է արտաքին լուսավորություն և այլն։ Բայց որ ամենակարևորն է, ծրագրի շնորհիվ ստեղծվել են անվտանգ միջանցքներ կենդանիների տեղաշարժի համար, ինչի արդյունքում էականորեն ավելացել է ընձառյուծների, բեզոարյան այծերի, գորշ արջերի թիվը։

Ծրագրի երկրորդ փուլի ընթացքում կայուն հողօգտագործման փորձի ներդրման համար Արարատի, Սյունիքի և Վայոց Ձորի մարզերի 5 համայնքների հետ կնքվել են երկարաժամկետ՝ 7-10 տարվա տևողությամբ բնապահպանական համաձայնագրեր՝ 10 գյուղական բնակավայրերում (Զանգակատուն, Հորս, Արենի, Խաչիկ, Արտավան, Սարավան, Բռնակոթ, Սալվարդ, Թասիկ, Արևիս) բնապահպանական միջոցառումներ իրականացնելու համար։ Այդ գյուղերին տրամադրվել է աջակցություն՝ երկարաժամկետ հողօգտագործման պլանների մշակման և կոնկրետ միջոցառումների իրականացման համար՝ բնական պաշարներն էկոլոգիապես կայուն ճանապարհով օգտագործելու նպատակով:

Այս բնապահպանական համաձայնագրերը թույլ են տալիս իրականացնել բնության պահպանություն՝ միևնույն ժամանակ աջակցելով համայնքներին իրականացնելու համայնքի սոցիալ-տնտեսական զարգացմանն ուղղված միջոցառումներ։

Օգտագործելով այդ միջոցները՝ համայնքները նաև կարողանում են մասնակցել պետական սուբվենցիոն ծրագրերին և լրացուցիչ միջոցներ ներգրավել այլ աղբյուրներից։

Այս պահին ընթացքի մեջ են հետևյալ միջոցառումները.

• գյուղտեխնիկայի տրամադրում Արենիում և Սիսիանում,
• արևային ջրատաքացուցիչների տրամադրում յուրաքանչյուր ընտանիքի Արտավանում,
• բարձրարժեք պտուղների մշակման համար ոռոգման համակարգի ներդրում Զանգակատանը,
• մակատեղիների կառուցում Հորսում։