Երեկ ՀՅԴ երիտասարդները կրկին ԿԳՄՍ նախարարության դիմաց էին, պահանջում էին հանդիպում և քննարկում նախարար Արայիկ Հարությունյանի հետ։ Հանդիպումը չկայացավ, նրանք փորձեցին մտնել նախարարության շենք, սակայն ոստիկանությունը բռնի ուժ կիրառեց և հեռացրեց երիտասարդներին: ՀՅԴ երիտասարդներից 24-ին ոստիկանությունը բերման էր ենթարկել բաժին:
Ի՞նչ եք կարծում՝ ինչո՞ւ ՀՅԴ-ն գնաց իրավիճակի սրման․ «Առաջին լրատվական»-ի հարցին քաղաքագետ Ռոբերտ Ղևոնդյանը պատասխանեց․ «Հաշվի առնելով այն, որ Երևանի մոտեցումը մինչև վերջերս պարզ չէր, այդ իսկ պատճառով որևէ քաղաքական ուժ սեփական մոտեցում չէր արտահայտում՝ հասկանալու համար, թե ինչպես պետք է դիրքավորվի։ Վերջին հանդիպումները թե՛ Երևանում Արայիկ Հարությունյանի հետ, թե՛ Ստեփանակերտում ավելի լայն ֆորմատով, ցույց տվեցին, որ որոշակիորեն Երևանը կողմնորոշվել է, թե ինչպիսի մոտեցում պետք է ցուցաբերի։ Իհարկե, նախկինի համեմատ, մոտեցումների մեջ մեծ տարբերություն կլինի՝ չի լինի այնպես, ինչպես Ռոբերտ Քոչարյանի և Սերժ Սարգսյանի ժամանակ էր։ Սակայն ամեն դեպքում Երևանը որոշակիորեն ցույց է տալիս իր վերաբերմունք, ցույց է տալիս, թե ինչ նախընտրություններ ունի։ Ցանկացած երկիր, որն ունի Արցախի պես պրոտեկտորատ, այնտեղ պետք է տեսնի իր քաղաքական կուրսին համահունչ իշխանություն։ Այդ իսկ պատճառով, այն ուժերը, որոնք Հայաստանում ընդդիմադիր վերաբերմունք ունեն Հայաստանի իշխանությունների նկատմամբ, արդեն սկսում են իրենց դիրքավորումը ցույց տալ նաև Արցախում։ Այդ իսկ պատճառով տրամաբանական է, որ ՀՅԴ-ն առաջինն է, իսկ հետագայում մենք, կարծում եմ, որ կտեսնենք նաև այլ ուժերի»։
Իսկ քաղաքագետ Արմեն Հովհաննիսյանն էլ ասաց․ «Չնայած, որ ՀՅԴ-ն Արցախի նախագահի ընտրություններում չունի սեփական թեկնածու, ամեն դեպքում, ես կարծում եմ՝ կսատարի թեկնածուներից որևէ մեկին։ Թե ով է դա լինելու՝ ես չեմ կարող ասել։ Ինչ վերաբերում է ՀՅԴ-ի պահվածքին Երևանում, ես դա մի քիչ կառանձնացնեի։ Ինձ համար դա տարօրինակ է թվում նախ դրա օգտագործած նյարդի չափերով, որովհետև հանրությանը ներկայացվող բուն խնդիրը դրան չարժե, և կարծում եմ, որ այդ խնդիրը շատ հեշտ կլուծվի։ Դա ես ասում եմ, որովհետև ինքս եղել եմ օտարալեզու դպրոցների դեմ պայքարի մասնակից՝ ինչպես շատ դաշնակցականներ, ինչպես այսօրվա նախարար Արայիկ Հարությունյանը։ Ես կարծում եմ, որ սա այն դեպքը չէ, ու այս առճակատումն այլ ոլորտում է։ Դա կապված է նրա հետ, որ ՀՅԴ-ն երկար տարիներ հսկում էր նախարարությունը, և նշանակում է՝ Արայիկ Հարությունյանի գործողությունների մեջ կան ինչ-որ բաներ, որոնք անընդունելի են ՀՅԴ-ի համար։ Բայց սա հաստատ աշխարհայացքային, գաղափարախոսական դաշտից չէ։ Սա ավելի շուտ, կարծում եմ՝ մտահոգությունների դաշտից է։ Մտահոգությունն էլ է մարդկային, բայց քաղաքական ռեսուրսը խմբային մտահոգությունը փարատելու համար էս ուժգնությամբ օգտագործելը, իմ կարծիքով՝ ռացիոնալ չէ»։
Մանրամասները՝ տեսանյութում։
