Հնդկաստանի ցամաքային ուժերը հրետանային հարված են հասցրել Պակիստանի վերահսկողության տակ գտնվող Քաշմիրի վիճելի տարածքում տեղակայված զինյալների ճամբարների վրա: Հրաձգության արդյունքում զոհվել են չորսից հինգ պակիստանցի զինվորներ, հայտնում է NDTV հեռուստաալիքը:
Ալիքի աղբյուրները պնդում են, որ սա պատասխան էր Պակիստանի վերահսկողության տակ գտնվող տարածքից հրետակոծություններին, որոնց ընթացքում սպանվել էին երկու հնդիկ զինվոր և մեկ քաղաքացիական անձ:
Իր հերթին, պակիստանյան Aaj TV հեռուստաալիքը հայտնել է, որ ի պատասխան հնդկական կողմից «չհրահրված գրոհի», պակիստանյան բանակը ևս կրակ է բացել և սպանել ինը հնդիկ զինծառայողների, ինչպես նաև ոչնչացրել է երկու բունկեր: Ըստ հեռուստաալիքի, փոխհրաձգության արդյունքում զոհվել է մեկ պակիստանցի զինծառայող և երեք քաղաքացիական անձ:
Ավելի վաղ, հոկտեմբեր ամսվա սկզբին, Հնդկաստանի զինված ուժերը խոստովանել էին, որ այս տարվա փետրվարին Ջամու և Քաշմիր նահանգում նրանք են հրթիռով խոցել իրենց Մի-17 ուղղաթիռը: Միջադեպի արդյունքում զոհվել էր յոթ մարդ: Պակիստանի բանակը հերքել էր այդ միջադեպին ներգրավվածությունը:
Պակիստանի և Հնդկաստանի հարաբերությունների սրացումը տեղի է ունեցել Քաշմիրում փետրվարի 14-ին տեղի ունեցած ահաբեկչությունից հետո, որի ժամանակ հնդկական կողմից զոհվել են 44 ուժայիններ:
