Վարչապետ Նիկոլ Փաշինյանը, Լոս Անջելեսում ասուլիսի ժամանակ անդրադառնալով ԱԱԾ նախկին տնօրենի հայտարարությանը, նշել է. «Արթուր Վանեցյանը՝ դե-յուրե լինելով ԱԱԾ տնօրեն, հայտարարություն է արել իր գերագույն հրամանատարի դեմ. սա անարգանք է Հայաստանի ԶՈւ-ի նկատմամբ, սպայի պատվի համար դրանից ավելի մեծ անարգանք չկա, սպայի այդպիսի արարքը նշանակում է ուսադիրները գցել աղբամանը: Այդպիսի բան վերջին անգամ արել են 1991 թվականին պուտչիստները»:
«Առաջին լրատվական»-ի հետ զրույցում վարչապետի այս գնահատականի վերաբերյալ իրենց դիտարկումները ներկայացրին լրագրող Կարպիս Փաշոյանը և «Քաղաքացիական պայմանագիր» կուսակցության հանրային կապերի համակարգող Վահագն Ալեքսանյանը:
Կարպիս Փաշոյանի դիտարկմամբ՝ պուտչիստները 1991-ին փորձում էին հեղաշրջում անել, իշխանությունը վերցնել իրենց ձեռքը, և նրանց հետ համեմատությունը պատահական չէր. «Լուրջ կասկածներ կան, որ Ա. Վանեցյանը փորձում էր հեղաշրջում իրականացնել և իշխանությունը վերցնել իր ձեռքը: Այս ամենի նախադրյալները կային անցած տարվանից ի վեր: Նա նախաձեռնություն դրսևորեց, որ դառնա ֆուտբոլի ֆեդերացիայի նախագահ, քիթը մտցնում էր իրեն չվերաբերող գործերի մեջ, փորձում էր միջամտել կառավարության աշխատանքներին, ամեն ինչ անում էր, որ իր վարկանիշը բարձրանա և ինչ-որ իմաստով մրցում էր վարչապետի հետ. երևում էր, որ նա քաղաքական լուրջ ամբիցիաներ ունի: Բայց նա միամտություն դրսևորեց, իր խաղաքարտերը շուտ բացեց և դարձավ իր ամբիցիաների զոհը»,- նշեց լրագրողը՝ նաև ընդգծելով, որ քաղաքական պատասխանատվությունը, այնուամենայնիվ, վարչապետի ուսերին է, քանի որ նա է Վանեցյանին նշանակել ԱԱԾ պետ: «Բազմաթիվ ինտելեկտուալ, ուժեղ սպաների ցանկից վարչապետն ընտրեց, թերևս, ամենաանհաջող տարբերակը՝ Արեշի «լավ տղու» բարդույթով տառապող և չեկիստական աշխարհայացքով, կիսագրագետ սպայի: Վանեցյանն ինքնուրույն չի գործում, նրան հուշում են, և նրան հուշող շրջանակները տապալվելուց հետո նրան մի կողմ կշպրտեն»,- նշեց Կ. Փաշոյանը:
«Պարոն Վանեցյանը չափազանց շատ էր սրտին մոտ ընդունել այն ժողովրդական սերն ու համակրանքը, որ ստացել էր Նիկոլ Փաշինյանի կողմից ԱԱԾ տնօրեն նշանակվելուց հետո: Նա ուղղակի նստել էր Ն. Փաշինյանի վարկանիշի վրա ու վայելում էր արևից եկող սերն ու ջերմությունը, որը շատ արագ դադարեց, և հիմա, կարծում եմ, նա իրեն զգում է՝ ինչպես սառը ցնցուղի տակ»,- նշեց Վ. Ալեքսանյանը:
«Պատկերացնո՞ւմ եք, եթե հանկարծ ես սկսեմ խոսել առանց իմ խոսքերի հետևանքների մասին խոսելու». անդրադառնալով վարչապետի կոշտ քննադատությանն ի պատասխան Վանեցյանի այս արտահայտությանը՝ ՔՊ հանրային կապերի համակարգողը նշեց. «Սա էժան շանտաժային տեքստ է, որի հեղինակը, կարծում եմ, կին է»:
Մանրամասն՝ տեսանյութում:
