ՀՀ ԿԳ նախարարության կողմից իրականացվող ամենամյա մեկամսյա սփյուռքահայ ուսուցիչների վերապատրաստման ծրագիրը սփյուռքի ուսուցիչներին հնարավորություն է ընձեռում գալ Հայաստան և վերապատրաստվել տարբեր առարկաներից: Այս տարի 18 երկրներից ընդգրկել է 84 ուսուցիչ: Ծրագրի այս տարվա առանձնահատկությունն այն է, որ ուսումնական խմբերից ձևավորվել են երկու նոր խմբեր՝պարի և արտադասարանական միջոցառումների կազմակերպման, ինչպես նաև կրթության կազմակերպման և կրթօջախների կառավարման համար:
ԿԳ նախարար Արմեն Աշոտյանի խոսքերով, ամեն տարի նոր բովանդակություն, նոր մոտեցումներ, նոր մեթոդաբանություն են փորձում առաջարկել, որ աշխատանքը տեղում ավելի նպատակային լինի և լուծի կարևորագույն խնդիր. այն է՝սփյուռքում մեր հայրենակիցների մեջ մայրենին պահպանել, զարգացնել, նպաստել ազգային մշակույթ, պատմություն ու աշխարհագրություն ուսումնասիրել և մեր երիտասարդ սերնդի մեջ ցանկություն ու կայծ առաջացնել՝ սեփական երկրին և պետությանը հաղորդակից լինելու համար:
Հայկական դպրոցները կադրերով ապահովելու համար իրականացվող հաջորդ ծրագիրը, որը տարեկան պետպատվերի շրջանակում 70 տեղ է տրամադրում մեր սփյուռքահայ հայրենակիցներին անվճար սովորելու հիմնականում հայագիտական առարկաներ՝ մանկավարժություն, երաժշտագիտություն, լրագրություն (ապագայում մեր երիտասարդ կադրերը պետք է համալրեն համայնքային ինտելեկտուալ ներուժը), նախարարի խոսքերով, նպատակային չի իրագործվում:
Պատճառն այն է, որ ծրագրի շրջանակում մասնակիցների զգալի մասը Հայաստանում բուհերն ավարտելուց հետո գերադասում են չվերադառնալ այն պետություններ, որտեղից իրենք գործուղվել են: Նախարարի խոսքերով, այդ մարդկանց վրա գումարներ ենք ծախսում, որ վաղը-մյուս օրը հայագիտության շարունակականություն ապահովեն: Այս տարվանից այդ դիմորդների հետ կնքվող պայմանագրերում հստակ դրույթ են սահմանելու, ըստ որի՝ եթե շրջանավարտը հրաժարվի սովորելուց հետո վերդառնալ իր պետություն և գաղթօջախում առնվազն երկու տարի չի աշխատի, ստիպված կլինի մուծել զգալի չափի հասնող տուգանք, որը կկազմի ավարտական կուրսի շուկայական արժեքի ութապատիկը, որպեսզի փոխատուցեն պետությանը պատճառված համապատասխան վնասը: Ըստ Արմեն Աշոտյանի՝ միայն այս ճանապարհով կհասկանան, որ հայրենիքի և սփյուռքի համատեղ ծրագրերը անձնական շահեր հետապնդելու համար չեն: