Ռուսաստանյան ինտեգրացիոն պրոյեկտները չեն դադարեցվի` անկախ Ղրիմի ծախսերից ու պատժամիջոցներից: «Առաջին լրատվական»-ի հետ զրույցում այս մասին ասաց Ռուսաստանի «Ազգային էներգետիկ անվտանգության հիմնադրամի» հիմնադիր և գլխավոր տնօրեն, տնտեսական և քաղաքական վերլուծաբան Կոնստանտին Սիմոնովը՝ անդրադառնալով այն տեսակետներին, թե անկանխատեսելի ծախսերի պատճառով ՌԴ-ն ստիպված կլինի դադարեցնել նախաձեռնած ինտեգրացիոն պրոյեկտները:
Նա նախ նկատեց, որ ՌԴ-ն այսօր լուրջ պատժամիջոցների տակ չէ, տնտեսական լուրջ պատժամիջոցները դեռ քննարկվող ծրագրեր են, իսկ ՌԴ-ի նկատմամբ Արևմուտքի կիրառած այցագրային սահմանափակումները Ռուսաստանի տնտեսական իրավիճակի վրա որևէ ազդեցություն ունենալ չեն կարող:
Ինչ վերաբերում է Ղրիմի չնախատեսված ծախսերին, ապա տնտեսական վերլուծաբանը նշեց, որ այսօր բավականին բարդ է խոսել, թե ինչ գումարի մասին է խոսքը, որովհետև տարբեր գնահատականներ են հնչում, և դրանք դեռ փոփոխվում են:
«Եթե մենք խոսում ենք սոցիալական հավելյալ ծախսերի մասին, ապա 50 հազար միլիարդ դոլարի մասին է խոսքը, եթե ենթակառուցվածքներում ներդրումների, ապա ավելի պակաս: Հիմնականում գերագնահատվում են ծախսերը Ղրիմում: Այս իմաստով հիմա տեղի է ունենում ծախսերի դրամատիզացիա: Շատերը կարծում են, որ դրանք անպատմելի թվեր են լինելու, իրականում մենք տեսնում ենք, որ ՌԴ-ն արդեն մի քանի խոշորամասշտաբ պրոյեկտներ է կարողացել հաղթահարել ՄՄ-ին զուգահեռ, ինչպիսիք են պրոյեկտները Վլադիվոստոկում, Կազանում, Սոչիում՝ Օլիմպիական խաղերը: Այսինքն՝ մենք սովորել ենք վաստակել և ճիշտ ծախսել մեր միջոցները:
Պետք է հասկանալ նաև, որ այդ հզոր պրոյեկտներն իրենք էլ իրենց ներդրումն են բերում տնտեսության մեջ, այսինքն՝ դրանք պարզապես ծախսեր չեն:
Ես չեմ կարծում, որ այդ հնարավոր ծախսերը կհանգեցնեն ինչ-որ բացասական զարգացման՝ մասնավորապես ինտեգրացիոն պրոյեկտների հետ կապված: Մենք արդեն սովորել ենք իրագործել միաժամանակ մի քանի խոշոր պրոյեկտներ, ուստի դրանք չեն հակասի իրար»,- ասաց Սիմոնովը:
Հարցին՝ հնարավոր տնտեսական պատժամիջոցները նույնպե՞ս վնաս չեն կարող հասցնել տնտեսությանը, նա պատասխանեց, որ
պետք է դեռ հասկանալ, թե ինչպիսին կլինեն դրանք, քանի որ ՌԴ-ն հանգիստ է՝ Եվրոպան այսօր ՌԴ-ին այլընտրանք չունի, Ռուսաստանին փոխարինելու տարբերակ չունի:
«ՌԴ-ից հրաժարվելը Եվրոպայի համար տնտեսական աղետ կլինի, ուստի այս ամենը դեռ համեմատական է: Իսկ Մագնիտսկու նման ցուցակը որևէ մեկին չի վախեցնում: Սպասենք տնտեսական պատժամիջոցներին, որից հետո կգնահատենք դրանց ազդեցությունը»,- ասաց Սիմոնովը:
