«Կան բաներ, որոնց խոսելու իրավունքը պետք է ձեռք բերել։ Ես ինքս ունեմ այդ իրավունքը, և ինձ նման շատ մարդիկ, որոնք նախորդ բոլոր տարիներին գործել են ընդդիմադիր դաշտում, իսկ այժմ չեն կազմում իշխանության մաս։ Բայց գործելով ընդդիմադիր դաշտում, երբեք տուրք չեն տվել հայհոյանքին, տուրք չեն տվել սադրանքին։ Այսինքն՝ եղել են քաղաքական ընդդիմադիրներ, չեն կպել մարդկանց անձնականին, չեն պիտակավորել մարդկանց, չեն հայհոյել։ Այդ ամենն ինձ համար անընդունելի է։ Իմ հոդվածում խնդիրները պատասխաններ էին հայհոյող կանանց վերաբերյալ, ինչի շուրջ վերջերս բովանդակային ծավալուն դիսկուրս է ծավալվում։ Դրանք պատասխաններ էին այն մարդկանց, որոնք զարմանում են, որ Հայաստանում կան բռնության կոչ անողներ։ Իհարկե, մի հասարակություն, որին տարիներ շարունակ լցրել ես անիմաստ, դատարկ կոնտենտով ու ֆաստֆուդային արժեքներով, որին չես տվել մշակույթ, ավելին՝ փորձել ես խլել ունեցած մշակույթը՝ արժեզրկելով ամեն ինչ, անորակ սերիալներում լեգալացրել ես բռի խոսույթը, բնականաբար, այդ հասարակությունը պետք է հայհոյի։ Դրանից խուսափել չենք կարող»,- «Առաջին լրատվական»-ի հետ զրույցում ասաց պատմաբան Վահրամ Թոքմաջյանը։
«Եկեք չզարմանանք։ Այն մարդիկ, որոնք եղել են այդ համակարգի ճարտարապետները, այն մարդիկ, որոնք կանգնած են եղել այդ համակարգի կերտման հետևում, զարմանալու իրավունք չունեն։ Զարմանալու իրավունք ունեմ ես, զարմանալու իրավունք ունեք դուք։ Ինչո՞ւ, որովհետև կարող է մեր անձնական խոսույթում մենք ինչ-ինչ բառեր օգտագործենք, որը երբեք չենք բերի հանրային քննարկման դաշտ։ Մյուս կողմից՝ անգամ մեր անձնական խոսույթում մենք դեմ ենք բռնությանը, մենք դեմ ենք մարդկանց պիտակավորելուն, մենք դեմ ենք այդ բարիկադներ կառուցելուն կամ խրամատներից կռվելուն։ Տեսեք, ես հիմա հանդես եմ գալիս իմ դեմքով՝ Վահրամ Թոքմաջյանը պատասխանատու է իր խոսքերի համար, բայց հները շարունակում են խոսել ֆեյքերի լեզվով։ Եթե խոսում եք բարիկադները քանդելուց, շատ լավ, եկեք խոսեք ձեր դեմքով, որովհետև հիմա չգիտենք, թե ում հետ ենք խոսում»,- հավելեց Վահրամ Թոքմաջյանը։
Բանախոսը նաև հավելեց, որ Հայաստանում չկա որևէ քաղաքական ուժ, որ ի զորու է կատարել հակահեղափոխություն։
Մանրամասները՝ տեսանյութում։