Լիբանանի հյուսիսում՝ Տրիպոլի քաղաքում, սունիական և ալավիական թաղամասերի միջև տեղի է ունեցել փոխհրաձգություն: Ինչպես հաղորդում է ITAR-TASS-ը, փոխհրաձգության պատճառը հինգշաբի 10-ամյա աղջկա սպանությունն էր դիպուկահարի կողմից:
Ավելի վաղ քաղաքի կենտրոնում երեք հանցագործ սպանել են 32-ամյա սունի տղամարդու, ով բնակվել է Ջեբել Մոհսեն շրջանում և ամուսնացած է եղել ալավի կնոջ հետ: Արաբական ժողովրդավարական սիրիամետ կուսակցության առաջնորդ Ռիֆաթ Իդը հանցագործությունը որակել է որպես մարտահրավեր ալավիական համայնքին:
Առկա տեղեկատվության համաձայն՝ փոխհրաձգության հետևանքով խաղաղ բնակիչների շրջանում վիրավորների թիվը հասել է 22-ի: Լիբանանի զինծառայողներն արգելափակել են վտանգավոր գոտի տանող փողոցները: Ի պատասխան՝ կրակ է բացվել Էլ-Քուբակի բանակային անցակետի վրա, վիրավորվել է երկու զինվոր:
Տեղի դպրոցները և Լիբանանի համալսարանի մասնաճյուղը հայտարարել են ուրբաթ օրը դասերի չեղյալ հայտարարման մասին:
