Երեքշաբթի Ղրղըզստանի ԱԳՆ-ը հանդես է եկել անսպասելի հայտարարությամբ Ուկրաինայի հարցով : Բիշքեկը հայտարարել է, որ Վիկտոր Յանուկովիչին չի համարում Ուկրաինայի լեգիտիմ նախագահ և նրա վերջին ելույթն անվանել է «անտեղի և ոչ ադեկվատ»: Այսպիսով, Ղրղըզստանը դարձել է ՀԱՊԿ անդամ առաջին երկիրը, որի դիրքորոշումն Ուկրաինայի հարցով հակասում է ռուսական դիրքորոշմանը, հաղորդում է «Կոմերսանտ»-ը:
ԱԳՆ հաղորդագրության համաձայն՝ Ղրղըզստանը դատապարտում է ցանկացած գործողություն, որն ուղղված է Ուկրաինայում իրավիճակի ապակայունացմանը:
«Այդ պատճառով անտեղի և ոչ ադեկվատ ենք համարում ընթացիկ տարվա մարտի 11-ի Վիկտոր Յանուկովիչի հայտարարարությունը: Ցանկացած երկրում իշխանության միակ աղբյուրը ժողովուրդն է: Չի կարող լեգիտիմ լինել այն նախագահը, ով ամբողջությամբ կորցրել է ժողովրդի վստահությունը, դե-ֆակտո կորցրել է նախագահական լիազորությունները և, ավելին, փախել է երկրից»,- ասվում է փաստաթղթում:
Ղրղըզստանի ԱԳՆ-ի կարծիքով՝ Ուկրաինայի այսօրվա ճգնաժամի պատճառը նախկին իշխանությունների չմտածված և կոռումպացված գործողություններն են: Հաղորդագրության համաձայն՝ Բիշքեկը կողմ է բանակցությունների և երկխոսության միջոցով ուկրաինական ճգնաժամի շուտափույթ կարգավորմանը՝ համապատասխան միջազգային իրավունքի նորմերի և ՄԱԿ-ի կանոնադրության:
Գերատեսչության մամլո քարտուղարը հաստատել է «Կոմերսանտ»-ին հաղորդագրության իսկությունը:
Նշենք, որ ՀԱՊԿ գլխավոր քարտուղար Նիկոլայ Բորդյուժայի վերջին հայտարարության համաձայն՝ կազմակերպությունը լիովին կիսում է Մոսկվայի դիրքորոշումն Ուկրաինայի հարցով: Մասնավորապես նշվում է, որ Ուկրաինայում իշխանափոխությունը եղել է «բռնի», իսկ Վիկտոր Յանուկովիչը երկրի «լեգիտիմ» և «օրինական ընտրված նախագահն է»:
